mediaНьурба артыыстара элбэх сиэрийэлээх киинэҕэ уһулуннулар
Саҥа үүммүт сыл саҕаланыыта «Саха» НВК ханаалыгар СӨ үтүөлээх суруналыыһа Сардаана Сивцева — Даана Сард айымньытынан «Сүлүһүннээх таптал» элбэх сиэрийэлээх киинэни Саха сирэ бүттүүн көрөр. Бу киинэ иннинэ Даана Сард «Ааспыт ааспат амтана» эр киһи уонна дьахтар сыһыана дьиктитик уонна уратытык суруллубут айымньытынан киинэ уһуллан, көрөөччү биһирэбилин ылбыта.
«Сүлүһүннээх таптал» киинэҕэ СӨ үтүөлээх артыыстара Надежда Петровна Ушницкая, Дмитрий Дмитриевич Михайлов, Елизавета Федотовна Потапова, Ньурбатааҕы көһө сылдьар драматическай тыйаатыр артыыһа, СӨ култууратын туйгуна, СӨ үтүөлээх артыыһа Майя Петровна Слепцова, култуура кэллиэһин выпускнига Саргылана Горохова, Мэҥэ-Хаҥалас Бэйдимэ култуура киинин дириэктэрэ Алексей Ходулов уһулуннулар.
Майя Петровна этэринэн Мииринэйгэ гастролга сырыттахтарына Елизавета Потапова, киинэ режиссера Лена Эверстова Даана Сард айымньытынан киинэҕэ уһулларга ыҥырбыттарыгар, төрөөбүт дойдутугар киинэҕэ уһулларга сөбүлэҥин биэрбит. Киинэни САССР үтүөлээх артыыһа, Ньурбатааҕы көһө сылдьар драматическай тыйаатырыгар кылаабынай режиссерунан үлэлээн ааспыт Спартак Иванович төрөөбүт дойдутугар Чурапчы оройуонун Бахсы нэһилиэгэр Былатыанапка, Наттаабай сайылыктарыгар уһулбуттар. Алаастыыраптар, Слепцовтар, Санниковтар дьиэ кэргэннэрин олохторо көстөр.
Майя Петровна Ньурбатааҕы тыйаатыр артыыстарынаан кылгас метражтаах киинэлэри уһулан, көрөөччү дьүүлүгэр таһаарбыттарын туһунан ахтан ааста.
— Мин судургу майгылаах, хомуньуустуу иитиилээх, олохторун оҥостубакка хаалбыт огдообо эмээхсин оруолун толоробун. Дьиҥ олоххо маннык майгылаах эмээхситтэр баар буолааччылар, — диэн кылгастык билиһиннэрдэ.
Ньурба тыйаатыгар саҥа үлэлээн эрэр эдэр артыыска Саргылана Горохова Чурапчы Сылаҥыттан төрүттээх. Киинэҕэ Алаастыыраптар улахан кыыстарын Моттокону оонньуур. Кини нарын-намчы, сэмэй майгылаах, айар дьоҕурдаах, айылҕаны кытары ыкса ситимнээх, хорсун санаалаах кыыс оруолун толорбутун туһунан этэр. Киинэҕэ уһуллар олус интэриэһинэйин, үчүгэйэ диэн киинэ архыыпка хараллан хааларын туһунан кылгастык билиһиннэрдэ.
Ааптар: Антонина СЕМЕНОВА
