mediaТаатта улууһун баһылыга сыллааҕы отчуотун иһитиннэрдэ
Таатта аҕа баһылыгын сыллааҕы отчуота саҕаланна. Улууска барыта 14 нэһилиэк баар. Михаил Соров уонна туһааннаах тэрилтэлэр салайааччылара ааспыт сыллааҕы үлэлэрин түмүгүн нэһилиэнньэҕэ билиһиннэрдилэр. Отчуот биир нэдиэлэттэн ордук кэмҥэ ыытыллара былааннанар.
Таатта баһылык үлэтин отчуоттуур биригээдэтэ үлэтин Даайа Амма нэһилиэгиттэн саҕалаата. Салайааччылар туох үлэ ыытыллыбытын сыыппара чахчытыгар олоҕуран билиһиннэрдилэр. Нэһилиэнньэ өттүттэн тыҥаан турар тыын суолталаах боппуруостар, этиилэр киирдилэр. Даайа Аммаҕа сүрүннээн суотабай сибээс хаачыстыбата мөлтөҕө, КСК өрөмүөнүн, спортивнай инвентарь ыларга көмө наадатын, саас, кыһын суолга грейдер үлэтин, оҕо уһуйааныгар толору хааччыллыыны киллэрии курдук уо.д.а. боппуруостар көтөҕөлүннүлэр.
Бүтэһигэр олохтоохтор улуус салалтатын үлэтин үчүгэйинэн сыаналаатылар. Эбиэт кэннэ отчуотутур биригээдэ Тыараһа нэһилиэгэр үлэлээтэ. Мунньахха 80-ча киһи кэлэн кыттыыны ылла. Олохтоохтор салайааччыларга үгүс ыйытыылары биэрдилэр. Оҕуруот аһын харайар ыскылаат тутуутун, шлюз-регулятор үлэтин, чааһынай хаһаайыстыбалар сүөһүлэрин сүтүүтүн сэрэтэр үлэни тэрийиини туруорустулар. Итиэннэ нэһилиэнньэ дьарыктаах буолуутугар үлэни тэрийии, оҕо уһуйаанын материальнай-техническэй баазатын бөҕөргөтүү туһунан уо.д.а. эттилэр. Мустубут дьон-сэргэ нэһилиэккэ сытыытык турар боппуруостарга сөптөөх эппиэттэри ылла. Олохтоохтор ордук оскуола тутуута үүммүт сылга саҕаланарын истэн үөрдүлэр.
Нэһилиэк баһылыга Святослав Сунхалыров отчуот туһунан санаатын маннык үллэстэр:
— Улуус баһылыга Михаил Соров отчуоттуур мунньаҕа олус үчүгэй, аһаҕас кэпсэтии таһымыгар ааста. Олохтоохтор мунаарар ыйытыыларын биэрэн, онно сөптөөх эппиэти ылан астыннылар. Биһиги нэһилиэкпит бу сылларга саҥа оскуола тутуутун күүскэ туруорсан, онно элбэхтик сүүрэн-көтөн тутуу ыытыллар түһүмэҕэ дьэҥкэрэн эрэриттэн астынабыт. Ол курдук, оскуола тутуута инвестиционнай программаҕа 2020 – 2021 сыллаахха киирдэ. Тутууну 2019 сылтан саҕалыырга үлэни ыытарга туруорустубут. Улуус баһылыга бу саамай тыын суолталаах боппуруоспутун өйөөтө, онон тутуубут үлэтэ бу сылтан саҕаланыаҕа. Иккис сүрүн кыһалҕабытынан нэһилиэккэ улахан кыамталаах квартальнай хочуолунай тутуута этэ. Бу үлэни Дьокуускай куорат «Газстройпроект» тэрилтэтэ бу сыл кулун тутар ыйга диэри бырайыагын оҥоруохтаах. Олох-дьаһах коммунальнай хаһаайыстыба салаатын былааныгар бу үлэ сыл бүтэһигэр киириэхтээх. Олохтоохтор улахан кыамталаах хочуолунай тутулларыгар баҕарабыт. Икки түһүмэҕинэн үлэҕэ киириэхтээх. Бастаан тэрилтэлэр, онтон чааһынай ыаллар холбонуохтаахтар. Биир улахан туруорсуубутунан алдьаммыт шлюз-регуляторбытыгар өрөмүөн үлэтин ыытыы буолар. Хас да мөлүйүөн солкуобайдаах өрөмүөн ыытыллар докумуона экспертизаны ааһар. Бу боппуруоһунан чуолаан М.И. Эртюков дьарыктана сылдьар. Үлэ хаамыыта саас, сайын биллиэхтээх, — диэтэ кини.
Оскуола тутуутун уочарата улууска кэһиллиэ суохтаах диэн нэһилиэк баһылыга Святослав Васильевич туруорсуутун улуус баһылыга өйөөтө. Бүтэһигэр Тыараһа нэһилиэгэ улуус салалтатын сыллааҕы үлэтин түмүгүн үчүгэйинэн сыаналаата.
Ааптар: С. ХАЛГАЕВА
