mediaҮөһээ бүлүүлэр сыбаалка реформатын бэлэмнээх көрсөллөр
РФ Бырабыыталыстыбатын № 354 уурааҕынан коммунальнай өҥөлөрү оҥоруу быраабылалара олохтоннулар. Өрөспүүбүлүкэ арҕаа өттүгэр, Бүлүү бөлөх улуустарга, «Олох-дьаһах хаһаайыстыбатын Мииринэйдээҕи тэрилтэтэ» ХЭУо биир сүрүн оператор буолла.
СӨ сыанаҕа политикатын Судаарыстыбаннай кэмитиэтин Бырабылыанньатын «2019 сылга СӨ территориятыгар кытаанах бөҕү-сыыһы (Твердые Коммунальные Отходы) дьаһайар эрэгийиэннээҕи оператор өҥөлөрүн иһин муҥутуур биир кэлим тарыып олохтонуутун туһунан» уурааҕар олоҕуран, Үөһээ Бүлүүгэ муҥутуур тарыып олохтонно. Бу сокуон 2019 сыл тохсунньу 1 күнүттэн олоххо киирдэ.
Маныаха «Олох-дьаһах хаһаайыстыбатын Мииринэйдээҕи тэрилтэтэ» ХЭУо дириэктэрэ Василий ТРУШКОВ сүрүн ирдэбиллэр, бэрээдэк туһунан иһитиннэрдэ.
— Сокуоҥҥа ыйыллыбыт күнтэн, ол эбэтэр 2019 сыл тохсунньу 1 күнүттэн бу төлөбүр ааҕыллыбытынан барар. Коммунальнай өҥө иһин төлөбүрү учуоттуур анал прибор суох буоллаҕына, коммунальнай өҥө төлөбүрэ дьиэҕэ, кыбартыыраҕа хас киһи регистрациялааҕынан ааҕыллар.
Үөһээ Бүлүү улууһугар уопсайа 12 үлэһиттээх кытаанах бөҕү-сыыһы дьаһайар үлэҕэ көҥүл ылбыт анал лицензиялаах «Полигон» ТКО оператора, чааһынай урбаанньыт Василий Прокопьев реформаҕа сөп түбэһэ тэриллэн, номнуо үлэтин хаамыыта сүрүннэнэн олорор.
— Олохтоох дьаһалта анаабыт миэстэлэригэр, ол эбэтэр 43 сиргэ бөх быраҕар улахан ууруналары туруордубут. Тымныы бириэмэҕэ нэдиэлэҕэ иккитэ бөҕү сыбаалкаҕа таһаара турабыт, — диир кини. Сотору кэминэн «Бүлүү» федеральнай суолун тайаан сытар уонна чугас эргин Үөдүгэй, Кэнтик нэһилиэктэрин баһылыктарын кытары дуогабардаһыахтаахпыт. Онтон салгыы өрүс уҥуоргу нэһилиэктэри кытары үлэлэһиэхпит. Оччоҕо үлэбит ыыра кэҥиэхтээх.
Максим СИЛИГИЯНОВ, «Үөһээ Бүлүү сэлиэнньэтэ» МТ баһылыга:
— Бу саҥа сокуон саҥа сылтан олоххо киирэригэр Бүлүү бөлөх улуустарыттан ордук бэлэмнээх биһиги улуус буоллубут диэн бэлиэтиибин. Бу үлэни тэрийиэх иннинэ бастаан аукцион ыытыллыбыта. Манна бэйэбит олохтоох уолбут, Евгений Корякин «ВВК-Групп» ХЭУо кыайан ылсыбыта. Уопсайа 2,5 мөл. солк. суумалаах үлэни кылгас кэм иһигэр оҥорон туттарбыта.
Бу туһунан сиһилии «Үөһээ Бүлүү» хаһыакка ааҕыҥ.
Ааптар: Кристина Яковлева
