«Үтүө күнүнэн, күндү Уус Алдан улууһун олохтоохторо! Бырабыыталыстыба отчуотун саҕалыырбын көҥүллээҥ!» — диэн СӨ бырабыыталыстыба бэрэссэдээтэлэ Владимир Солодов бэйэтин дакылаатын уу сахалыы тылынан эҕэрдэлээн саҕалаабытын, саала иһигэр толору мустубут дьон дохсун ытыс тыаһынан көрүстүлэр.
Премьер Владимир Солодов саха тылын үөрэтэ сылдьарын истэ-билэ сылдьар дьон улахан дуоһунастаах киһи тыа сирин олохтоохторугар убаастабыллаах сыһыанын көрдөрбүтүн бэлиэтии көрдүбүт. Владимир Солодов толоруулаах былаас отчуотун билиһиннэрэрин быыһыгар, Уус Алдан улууһугар сыһыаннаах боппуруостарга сиһилии тохтоон, быһааран иһэрэ, отчуокка олохтоохтук бэлэмнэнэн кэлбитин туоһулуур. Ол курдук, чопчу Дүпсүн нэһилиэгин олохтоохторо иһэр уонна хаһаайыстыбаҕа туттар уулара суох эрэйдэнэллэрин бэлиэтээтэ. Хара маҥнайгыттан толкуйдаммакка ууну хачайдыыр ситим ууну өрүстэн буолбакка, күөлтэн хачайданар курдук оҥоһуллубута өйдөммөтүн ыйда. «Ол түмүгэр 150 мөл.солк судаарыстыба харчыта туттуллан, ууну хачайдыыр турба туттуллан баран, үлэлээбэккэ турара өйдөммөт» диэн эттэ. «Онон манна үлэлэспит салайааччылар эппиэккэ тардыллыахтара. Оттон бырайыагы хаттаан үөрэтэн көрөн баран, олохтоохтор санааларын учуоттаан оҥоруохпут. Биллэн турар, бу бырайыагы саҥардарга үтүмэн ааҕыы-суот оҥоһуллуутугар сыл аҥаарын курдук кэм барыаҕа», — диэн бэлиэтээтэ Владимир Солодов.
Владимир Солодов мустубут дьоҥҥо бырабыыталыстыбаттан Уус Алдан улууһугар кураторынан Степан Саргыдаев анаммытын билиһиннэрдэ. Этиитин түмүгэр: «Мин олус аһаҕас салайааччыбын. Ким туох боппуруостаах миэхэ хаһан баҕарар тахсыаххытын сөп», — диэтэ уонна — «Истибиккитигэр махтанабын!» — диэн дакылаатын уу сахалыы тылынан түмүктээтэ.
Лена Павлова, култуура управлениетын салайааччытын солбуйааччы, уопсастыбаннай тэрилтэлэри сүрүннээччи, Күлүмнүүр аатынан култуура киинин туттарары туруоруста. Мүрү нэһилиэгин Бочуоттаах олохтооҕо Татьяна Бочкарева улуус киинигэр улахан кыамталаах хочуолунайдары туттарарга, учууталлары уонна быраастары олорор дьиэнэн хааччыйыыга, сир анныттан, скважинаттан хачайданар уу бүтэн эрэрин учуоттуулларыгар, бу боппуруоһу көрөллөрүгэр туруоруста.
Елена ПОТОЦКАЯ, «Саха сирэ» хаһыат, edersaas.ru