Ньурба улууһун дьахталларын сэбиэтин саҥа састаабын таллылар
Ньурба оройуонунааҕы дьахтар сэбиэтин уочарата суох отчуоттуур-быыбардыыр кэмпириэнсийэтэ бэрт тэрээһиннээхтик ыытылынна. Улуустааҕы дьахтар сэбиэтин саҥа састаабын таллылар.
Ньурба улууһун баһылыга Алексей Михайлович Иннокентьев кэмпириэнсийэҕэ кыттыыны ылла, эҕэрдэлээтэ, дьахтар олоҕу хамсатар күүс буоларын тоһоҕолоон бэлиэтээтэ. Быйыл РФ Театр, Саха сиригэр Сомоҕолоһуу, Ньурба улууһугар Киһи ис кыаҕын арыйар сыл биллэриллибитин, быйыл манна сыһыаннаах туох, ханнык үлэлэр улууска ыытыллыахтаахтарын туһунан билиһиннэрдэ.
Улуус баһылыгын социальнай боппуруоска солбуйааччы Анна Михайловна Уларова дьахтар сэбиэтин ааспыт сыллааҕы үлэтин отчуоттаата. Өрөспүүбүлүкэтээҕи тэрээһиҥҥэ Үөһээ Бүлүүгэ «Автоледи» куонкуруһугар Акана уонна Маар дьахталларын сэбиэттэрэ кыттыыны ылбыттарын, өрөспүүбүлүкэтээҕи дьахталлар уопсастыбаннай тэрилтэлэрин Сойууһун бэрэссэдээтэлэ Анжелика Андреева кыттыылаах улуус уопсастыбаннай дьахталларын Форума, улууска дьахтар уопсастыбаннай хамсааһына 70 сылын бэлиэтээммитин, оройуон дьахталларын түмсүүлэрэ араас аһымал хамсааһыннары тэрийэн ыыталларын, көхтөөхтүк кытталларын туһунан кэпсээтэ.
Ньурба к., Күндээдэ, Акана, Малдьаҕар нэһилиэктэрин дьахтарын сэбиэтин үлэтин туһунан иһитиннэрии оҥоһулунна. Улуус наставниктарын Сэбиэтин чилиэнэ Ульяна Максимова, «Арассыыйа ийэлэрэ» РОО Ньурбатааҕы отделениетын бэрэссэдээтэлэ Анна Туманова үлэлэрин билиһиннэрдилэр, улуус Ытык сүбэтин бэрэссэдээтэлэ Михаил Иванов эҕэрдэ тыл эттэ.
Дискуссиялыыр былаһааккаларынан тарҕаһан, «Нация доруобуйата – дьахтар илиитигэр», « Иитэр-үөрэтэр үлэҕэ дьахтар сэбиэтин оруола», «Дьиэ кэргэҥҥэ асоциальнай көстүү профилактиката», «Дьахталлар уопсастыбаннай көҕүлээһиннэрэ» тиэмэлэринэн бэйэлэрин санааларын үллэһиннилэр.
Нэһилиэктэртэн талба талааннаахтар оҥоһуктарын быыстапката, бырайыактары көмүскээһин буолла.
Ааптар: Антонина СЕМЕНОВА.