Аппаанылар интэриэһиргиир боппуруостара үгүс

Нам улууһун «Хатыҥ Арыы нэһилиэгэ» муниципальнай тэриллиигэ үс нэһилиэк киирэр.

edersaas.ru

Ол курдук,  үс нэһилиэги холбоон «Хатыҥ Арыы нэһилиэгэр» МТ 3108  киһи олорор: Аппааныга — 1863, Граф Биэрэгэр — 930, Кыһыл дэриэбинэҕэ — 315 киһи.

Хаһан буоларын курдук, ситэриилээх былаас отчуотугар кэпсэтиини тыыл уонна үлэ бэтэрээннэрэ саҕалаатылар. Бэлиэтээн эттэххэ, Аппааныга — 13, Граф Биэрэгэр — 3, Кыһыл дэриэбинэҕэ — 1 тыыл бэтэрээнэ олорор.

Тыыл бэтэрээнэ Февронья Ушницкая соторутааҕыта сэрии оҕолоругар көрүллүбүт чэпчэтии уонна ааспыт сылга Хомсомуол 100 сыллаах үбүлүөйүгэр бэриллибит мэтээллэр уонна уордьаннар суолталарын туһунан ыйытта.

Ситэриилээх былаас отчуотун ыытар бөлөх салайааччыта Антонина Винокурова бэтэрээҥҥэ маннык хоруйу биэрдэ:

Былырыыҥҥы үбүлүөйдээх мэтээллэр уонна уордьаннар Коммунистическай баартыйа бэйэтин бэлиэ наҕараадалара. Дойду бырабыытылыстыбатын официальнай наҕараадатыгар сыһыана суох. Оттон сэрии оҕолоругар көрүллүбүт чэпчэтиини быһаардахха, сэрии оҕотун статуһун ылбыт киһи бэтэрээҥҥэ көрүллүбүт көмө ханнык көрүҥүн таларын бэйэтэ быһаарыахтаах.

Үлэ бэтэрээнэ Тихон Григорьев болҕомтону эр дьон хамсааһыннарыгар, уопсастыбаннай тэрилтэлэригэр, оҕону иитиигэ сайыҥҥы үлэ лааҕырдарын аһыыга боппуруостарыгар туһаайда.

Сопхуос саҕана агрономунан үлэлээбит нэһилиэк ытыктанар киһитэ өр кэмҥэ Аҕа сэбиэтин салайбыт эбит. Бу боппуруоска улуус баһылыга Юрий Слепцов хоруйдаата:

Билиҥҥи кэмҥэ уопсастыбынньыктар суолталарын өйдөөн, дьону түмэр күүстэрин учуоттаан, быйылгы сылтан улуус дьаһалтатыгар уопсастыбынньыктары кытта үлэлиир соругу туруоран, анал отдел арыйдыбыт. Ол курдук, бэтэрээннэри, ыччаты, уопсастыбаннай тэрилтэлэри кытта  4 исписэлиис үлэлиэҕэ. Онон эн курдук уопсастыбанньыктар улуус дьаһалтатыгар кэлэн бу салаа үлэһиттэригэр санааҕытын этиҥ, бииргэ үлэлээҥ.
Аппааны олохтооҕо Анна Габышева Дьокуускай к. Чернышевскай уулуссатыгар баар уоптабай ырыынагы ким хонтуруоллуурун ыйытта. «Онно болдьоҕо тахсыбыт аһы атыылыыллар», — диэн эттэ. Улуустан киирбит ыарыһахха «Суһал көмө» эмчиттэр болҕомтолоро суоҕун бэлиэтээтэ.

Онуоха Доруобуйа харыстабылын министиэристибэтин бэрэстэбиитэлэ Анастасия Эверстова:

«Суһал көмө» быраастара ким хантан сылдьарын ыйыппаттар. Ыарыһах аадырыһын уонна диагноһын ыйыталлар. Онон улуустан сылдьар киһини эбэтэр куорат олохтооҕо буоларын хайдах да араарар кыахтара суох, — диэн хоруйу биэрдэ.

Аппааны оскуолатын информатикаҕа учуутала Вячеслав Яковлев атын сиртэн көһөн кэлбит эдэр ыалларга дьиэ тутталларыгар туох өйөбүл баарын ыйыталаста.

Педагогическай үлэ бэтэрээнэ Феврония Протодьяконова эдэр ыалларга курдук кырдьаҕас дьоҥҥо тоҕо тус сыаллаах өйөбүл суоҕуй диэн интэриэһиргээтэ.

Бырабыытылыстыба чилиэннэрэ уонна улуус салалтата ыйытыы биэрбит дьоҥҥо сиһилии туох-ханнык өйөбүллэр баалларын быһааран биэрдилэр. Аппааны нэһилиэгин олохтоохторо бырабыытылыстыба 2018 сыллааҕы үлэтин биһирииллэрин биллэрдилэр.

Мунньах бүппүтүн кэннэ ситэриилээх былаас отчуотун ыытар эппиэттээх үлэһиттэр дьону кытта биирдиилээн көрүстүлэр.

Олохтоохтор санааларын санааларын иһиттилэр, туруорсар тус боппуруостарын ырыттылар.

Аппааныга сылдьан баран, ситэриилээх былаас отчуотун ыытар бөлөх салгыы Түбэ, Хатырык, Граф Биэрэгин нэһилиэктэрин олохтоохторун кытта көрсүөхтэрэ.

Елена ПОТОЦКАЯ, «Саха сирэ» хаһыат, edersaas.ru

Хааартыскаҕа ааптар түһэриитэ.

0
0

Добавить комментарий