Кыайыылаахтар бэлиэтэннилэр

Географ идэлээх Дьокуускай к. олохтоохторо Маргарита, Александр Герасимовтар 2015 с. Покровскайга олорор ураты айылгылаах Иван Иванович Монастыревы-Тирэх Уйбааны кытары бастакы билсиһиилэритигэр оҕолорго анаан күнү-дьылы кэтээн көрөр күннүгу оҥорор санаалаахтарын туһунан билиһиннэрбиттэрэ.

edersaas.ru

Ону Тирэх Уйбаан бэркэ сэргээбитэ уонна үүнэр сүһүөх ыччаты айылҕаҕа чугаһатарга, кинилэр айылҕаны истэ, сүгүрүйэ үөрэнэллэригэр кэскиллээх дьыала буолуоҕун түстээбитэ. Ытыктыыр киһилэрин алгыһынан Герасимовтар быйыл төрдүс сылларын «Айылҕаны кэтээн көрүү» күннүгүн таһаардылар. Бу сыллар усталарыгар кинилэри өйдүүр уонна өйүүр дьон баар буоланнар, бырайыактарын кэҥэтэн, былырыын Үөрэх министиэристибэтин итиэннэ Экология, айылҕаны туһаныы, ойуур хаһаайыстыбатын министиэристибэтин кытары кыттыһаннар, оскуола үөрэнээччилэригэр анаммыт «Айылҕаны кэтээн көрүү — 2018» өрөспүүбүлүкэтээҕи куонкуруһу тэрийбиттэрэ.

Куонкурска барыта 2000 тахса оҕо сайаапка биэрбититтэн, биэтэккэ 400 оҕо тиийэн үлэлэрин ыыппыттара. Алын кылаас үөрэнээччилэригэр кыайыылаахтар арыый эрдэ быһаарыллыбыт буоллахтарына, үрдүкү кылаастарга түмүк иккис түһүмэххэ таһаарылынна. Бастыҥтан бастыҥ үлэлээх сүүрбэ үөрэнээччи “Бэс чагда” оҕо сынньалаҥын киинигэр икки нэдиэлэ устата үлэлэрин көмүскээтилэр, таарыйа экскурсияларга сылдьан, доруобуйаларын туругун бөҕөргөтөн астыннылар. Кыайыылаахтары чиэстээһин бэҕэһээ Наукалар Академияларын саалатыгар тэрилиннэ.

Саха биллэр дьылдьыттарын М.П.Кондратьев-Моохучча, Р.Г.Плотников – Мэҥэ Арамаан, С.Л.Оконешников-Туотайар, Д.Н.Федоров, И.Г.Дьяконов, М.Н.Сибиряков, билгэлэри үөрэппит биллиилээх суруйааччылар С.С.Васильев-Борогонскай, И.М.Сосин, Бүлүү Чинэкэтиттэн Тонгоесовтар учууталлар династияларын ыччаттара уонна аймахтара кыайыылаах оҕолорго харчынан бириис олохтоотулар. СГУ биолого-географическай факультетын география салаатын “Г-85” бөлөҕүн бүтэрбит дьон преподавателлэрин Г.Н.Максимов, К.Е.Кононов, М.П.Сергеева сырдык ааттарын үйэтитэн бириис туруорбуттара көрсүһүүнү өссө истиҥ оҥордо.

Бастыҥ үлэлээх оскуолалар уонна учууталлар бэлиэтэннилэр. Ол курдук, Дьокуускай куорат 7-с №-дээх оскуолата “Г-84” бөлөх олохтообут С.Е. Мостахов аатынан бирииһин уонна Майатааҕы 2 №-дээх оскуола Г.Ф.Корякин оҕолоро олохтообут бириистэринэн итиэннэ Айылҕа харыстабылын министиэристибэтин “Махтал суругунан” бэлиэтэннилэр. “Бастыҥ кылааһынан үлэ” номинациянан В.Г.Павлов аатынан Сунтаар алын сүһүөх оскуолатын 3 “б” кылааһа (сал. Н.В.Васильева) наҕараадаланна. Үрдүкү кылаастары кытта ситиһиилээхтик үлэлэспит Намнааҕы гимназия географияҕа учуутала Л.В. Бочкарева уонна Таатта улууһун С.Р.Кулачиков – Эллэй аатынан Чычымах орто оскуолатын биологияҕа уонна географияҕа учуутала Д.Е.Иванова Үөрэх уонна наука министиэристибэтин “Махтал суругун” туттулар. Куонкуруска кыттыбыт бары оҕолорго уонна кинилэри бэлэмнээбит учууталларга уонна төрөппүттэргэ тэрийээччилэр махтал истиҥ тылларын тиэрдэллэр.

Раиса Сибирякова, «Саха сирэ» хаһыат, edersaas.ru.