media
Амма Наахараҕа Николай Никитин бирииһигэр тустуу күрэхтэһиитэ буолла. Спорт түһүлгэтигэр ыраахтан-чугастан эдэр тустууктар түмүстүлэр.
Амма Наахара саҥа арыллыбыт спортсаалата оҕо ыччатынан туолла. Үтүө киһи аатыгар ыытыллар аһаҕас өрөспүүбүлүкэтээҕи күрэхтэһии төрдүс төгүлүн ыытыллар. Амма улууһун биир чулуу киһитэ, дэгиттэр спортсмен, Амма улууһуттан ССРС бастакы спорка маастара Николай Никитин аатын үйэтитэр сыаллаах оҕолоро, дойдутун дьоно икки сылга биирдэ оҕолорго анаан күрэхтэһии тэрийэллэр.
Быйыл күрэхтэһиигэ уопсайа 11 хамаандаттан 97 тустуук кытынна. Ол курдук Амматтан, Алтантан, Соморсунтан, Сулҕаччыттан, Болугуртан, Амма Наахараттан, ону сэргэ Дьокуускайтан, Чурапчы, Нам улуустарыттан эдэр тустууктар кэлэннэр кыраһыабай киирсиилэри көрдөрдүлэр. Күрэхтэһии уопсайа 10 ыйааһыҥҥа ыытылынна.
Маны таһынан 2005-2007 сыл төрүөх уонна 2008 уонна онтон үөһээ ыйааһыҥҥа оҕолор ортолоругар абсолютнай күрэхтэһии буолла. Манна Соморсунтан Максим Кононов уонна Амматтан Артем Винокуров кыайыылаах үрдүк аатын ситистилэр.
Ааптар: Наталья Бубякина
