Ньурба оройуонугар бэтэрээннэр өрөспүүбүлүкэтээҕи форумнара ыытылынна
Ньурба оройуонугар бэтэрээннэр өрөспүүбүлүкэтээҕи форумнара ыытылынна
Бэтэрээннэр өрөспүүбүлүкэтээҕи сэбиэттэрэ көҕүлээһининэн, Ньурба оройуонун дьаһалтата өйөөһүнүнэн, Түмүк нэһилиэгэр ытык дьон форумнара буолан ааста. Мунньахха сэрии уонна үлэ бэтэрээннэрин сүрүн сэбиэтин бэрэссэдээтэлин солбуйааччы Никита Никитич Ноев, түөрт Бүлүү бөлөх улуустарын бэтэрээннэрэ, уопсайа Ньурба улууһун 15 нэһилиэгиттэн кыттыыны ыллылар.
Ньурба улууһун Түмүк нэһилиэгин «Алгыс» норуот айымньытын Киинин территориятыгар «Ким да умнуллубат, туох да умнуллубат» сэриигэ өлбүт буойуннар пааматынньыктарыгар миитин буолла. Улуус баһылыгын социальнай боппуруоска солбуйааччы Анна Уларова эҕэрдэлээтэ. Киэҥ ыҥырыылаах мунньахха кэлбит ыалдьыттар, олохтоох МТ дьаһалтатын баһылыга Иннокентий Саморцев пааматынньыкка гирлянда уурдулар.
Форум «Кырдьар сааска көхтөөх олоҕу тутуһуу», 2020 сылга бэлиэтэниэхтээх өрөгөйдөөх Улуу Кыайыы 75 сылын үбүлүөйүгэр ананна.
Түмүккэ дьиэҕэ олорор тыыл бэтэрээннэригэр Мария Федороваҕа,Мария Гаврильеваҕа, Ирина Павловаҕа СӨ бэтэрээннэрин сэбиэтин Бочуотунай грамоталарын, СӨ Пенсионнаҋ фонда отделениетын, СӨ РФ соцстрах Фонда бэрэстэбиитэллэрин ааттарыттан сэмэй бэлэхтэри, Ньурба оройуонун дьаһалтатын, улуустааҕы социальнай харалтатын управлениетын ааттарыттан Махтал суруктары туттардылар.
Өрөспүүбүлүкэтээҕи сэрии уонна үлэ бэтэрээннэрин сэбиэтин бэрэссэдээтэлин солбуйааччы Никита Ноев үөрүүлээх быһыыга-майгыга «Бочуоттаах бэтэрээн» СӨ Бочуотунай Бэлиэни Яков Иванович Егоровка, үлэ бэтэрээннэригэр Бочуотунай грамоталары туттартаата.
Улуус баһылыгын социальнай боппуруоска солбуйааччы Анна Уларова Ньурба оройуонун сэрии, тыыл бэтэрээннэригэр, аҕам саастаах дьоҥҥо болҕомтолоох сыһыан олохтонон үлэ барарын туһунан эттэ. Ааспыт сылтан оройуоҥҥа Ытык Сүбэ саҥа састааба талыллан, бэрэссэдээтэлинэн улуус Бочуоттаах олохтооҕо Михаил Иванов ананан үлэлиирин, Улуу Кыайыы 75 сылыгар улууска анал хамыыһыйа тэриллэн үлэ барарын туһунан билиһиннэрдэ. Оройуон Ытык Сүбэтин Сэбиэтин бэрэссэдээтэлин солбуйааччы Татьяна Олесова аҕам саастаах дьоҥҥо Үһүс көлүөнэ оскуолата тэрийэн үлэлэтэллэрин, аныгы ыччат дьаныардаах, сүрэхтээх, олоххо тардыһыылаах, кэнэҕэски өртүгэр кэскиллээхтик олороллоругар аҕам саастаах дьон сүбэ-ама буолан үлэлэһэллэригэр ыҥырда.
Методическэй сэминээр кэмигэр кэлиҥҥи сылга ылыныллыбыт сокуоннарга олоҕуран уонна саҥа уларыйыылар тустарынан СӨ Пенсионнай фонда отделениетын биэнсийэ анааһын уонна биэнсийэни хаттаан анааһыҥҥа кылаабынай исписэлиис-экспиэрэ Роман Афанасьев билиһиннэрдэ. Гериатрическай отделение сэбиэдиссэйэ, үрдүк категориялаах гериатр-быраас Екатерина Мучина кырдьар сааска көхтөөх олоҕу тутуһарга бириэмэтигэр бэйэни көрдөрүнүү, сөпкө сынньаныыны олохтооһун, аһы-үөлү хайдах тутуһар туһунан кэпсээтэ. Оройуоҥҥа гериатрия киинэ, гериатр-быраас баар буолуохтааҕын эттэ. СӨ РФ социальнай страхование Фондатын социальнай бырагыраамаҕа отделын салайааччытын солбуйааччыта Наталья Протопопова доруобуйаларынан хааччахтаах дьоҥҥо судаарыстыбаннай өҥөлөрү оҥорууга чуолаан, техническэй сириэстибэлэргэ уонна санаторий-курорт эмтэниитигэр барааччыларга аналлаах уларыйыылары билиһиннэрдэ. Мэҥэ Хаҥалас бэтэрээннэрин сэбиэтин бэрэссэдээтэлэ ааспыт сылга туох-ханнык үлэлэр ыытыллыбыттарын уонна быйылгы сыллааҕы үлэ былаанын билиһиннэрдэ. Улуустааҕы социальнай харалта управлениетын салайааччыта Ирина Находкина бэтэрээннэргэ аналлаах СӨ судаарыстыбаннай социальнай өйөбүллэр тустарынан билиһиннэрдэ.
Никита Ноев:
— 2018 сылга өрөспүүбүлүкэтээҕи бэтэрээннэр түмсүүлэрэ Ньурба улууһун Чаппанда нэһилиэгэр ыытыллыбыта. Быйыл эмиэ бу улуустан саҕаланна. Сылын аайы бастыҥ сэбиэт бэрэссэдээтэллэрин талыыга 2017 сылга Мэҥэ Хаҥалас бэтэрээннэрин сэбиэтин бэрэссэдээтэлэ Маргарита Михайловна Максимова бастыҥ буолбута. 2018 сыл түмүгүн таһаарыыга Үөһээ Бүлүүтээҕи Иван Егорович Чичахов бэрэссэдээтэллээх бэтэрээннэрин сэбиэтэ бастаабыта, «Бастыҥ бэрэссэдээтэл» аатын Мииринэй куорат бэтэрээннэрин сэбиэтин бэрэссэдээтэлэ Николай Федотович Калюжнай ылбыта.
Бэтэрээннэр бэйэлэрин санааларын үллэһиннилэр, спортивнай күрэхтэргэ нууччалыы бильярдка, сахалыы остуол оонньуутугар, саахымакка уонна «Эдэрдии эрчиминэн» бальнай үҥкүүгэ күрэхтэстилэр. Түмүк нэһилиэгэр ыытыллар форум үрдүк таһымнаахтык ыытылынна.
Бүлүүтээҕи бэтэрээннэр сэбиэттэрин бэрэссэдээтэлэ Герасим Солтуев үлэ бэтэрээннэригэр сибидиэтэлистибэлээх мэтээли туруорсуута, Үөһээ Бүлүү бэтэрээннэрин сэбиэтин бэрэссэдээтэлэ Иван Чичахов тыыл бэтэрээннэригэр дьиэлэри тутууга диэн этиитэ резолюцияҕа ылынылынна.
Ааптар: Антонина СЕМЕНОВА.