mediaДьокуускай үһүс төгүлүн Open Innovations Startup Tour – 2019 Уһук Илиҥҥи түһүмэҕэр эдэр стартапердары уонна бөдөҥ инвестордары муста. Бүгүн панельнай дискуссиялар, сессия уонна “Сколково” бэрэстэбиитэллэрин кэпсэтиилэрэ саҕаланна.
“Биһиги төһө да уустук айылҕалаах уонна экэниэмикэлээх сиргэ олордорбут, IT курдук салааларга киһи хапытаала баар буоллаҕына, тэтимнээх хамсааһыны оҥорор кыахтаахпытын дакаастаатыбыт”, — диэтэ Саха сирин баһылыга Айсен Николаев, маныаха кини бу өрөспүүбүлүкэ тэтимнээх сайдыытыгар олук буоларын бэлиэтээтэ.
Панельнай кэпсэтии кэмигэр MyTona хампаанньа бэрэсидьиэнэ Александра Баишева билигин хампаанньаҕа 500 тахса киһи үлэлиирин туһунан кэпсээтэ. Маныаха MyTona үлэһитин ахсаанын элбэтэн, саҥа хайысхалары, жанрдары уонна сири-уоту баһылыыр баҕалаах. “Биһиги маастар-кылаастары, аһаҕас көрсүһүүлэри ыытабыт, онно хайа кыалларынан элбэх кыахтаах үлэһити тарда сатыыбыт”, — диэтэ Александра Баишева.
Күн бүгүн бу хампаанньа Арассыыйаҕа уонна СНГ IT-хампаанньалартан биир бөдөҥнөрө. Хампаанньа ПК уонна мобильнай платформаларга оонньуулары айыынан дьарыктаммыта 10 тахса сыл буолла. Хампаанньа географията киэҥ: оонньуулар Дьокуускайга, Ивановоҕа, Санкт-Петербурга, Сингапурга, ону тэҥэ Владивостокка айыллаллар.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
