“Биһиги дойдубут — Арассыыйа” массыынанан айан кыттыылаахтара Чурапчыга сырыттылар

Саха Өрөспүүбүлүкэтин киин быыбардыыр уонна Дьокуускай куорат быыбардыыр хамыыһыйалара  “Биһиги дойдубут — Арассыыйа” диэн массыынан айаны ыытар. Бэһис сырыы Чурапчы нэһилиэгэр кулун тутар 13 күнүгэр кэлэн барда.

---

“Биһиги дойдубут — Арассыыйа” массыынан айан кыттыылаахтара Дьокуускай — Аллара Бэстээх — Чурапчы — Ытык Күөл — Хаандыга хайысханан суоллара тыргыллар.  “Биһиги айаммыт быыбар уонна быыбардааччы бырааптарын биллэрэр, иһитиннэрэр сыаллаах-соруктаах. Оройуон быыбардыыр хамыыһыйаларын икки ардыгар уопут атастаһыытын тэрийэбит. Айаммыт тэрээһин боппуруостарыгар бырабыыталыстыба бэрэссэдээтэлин солбуйааччыта Ольга Балабкина өйүүр”, — диэн Дьокуускайдааҕы хамыыһыйа бэрэссэдээтэлэ Алла Самойлова иһитиннэрдэ.

Бөлөх салгыы Чурапчытааҕы физическэй култуура уонна успуорт судаарыстыбаннай институтун баазатыгар оскуола үөрэнээччилэригэр уонна ыччакка анаан хамаандаҕа арахсан оонньуу ыытыллыытыгар кытынна. Дьүүллүүр сүбэ чилиэттэринэн СӨ киин быыбардыыр хамыыһыйа бэрэссэдээтэлэ Алексей Ефимов, Дьокуускайдааҕы ТБХ бэрэссэдээтэлэ Алла Самойлова уонна Чурапчытааҕы хамыыһыйа бэрэссэдээтэлэ Егор Давыдов үлэлээтилэр.

Ааптар: Семен Жендринскэй.