Тумулга төрөппүттэр хаҥкылыыр сири оҥордулар
Күн уһаан, оҕолорбут барахсаттар сибиэһэй салгынынан тыынар үтүө күннэрэ үүннэ.
edersaas.ru
Быйыл биһиэхэ, Тумулга, эдэр ыал Алёна уонна Борис Пахомовтар бэйэлэрин баҕаларынан оҕолорго каток оҥордулар.
Эдэр дьон үтүө дьыалалара үгүстэргэ холобур буолуон буолла. Алёна Семеновна, Борис Александрович хаары бэйэлэрэ иккиэн күрдьүбүттэрэ. Кэлин кинилэргэ ОДьКХ үлэһитэ Геннадий Соловьев, төрөппүттэр Сардаана Кириллина, Татьяна Строева оҕолорун кытта уу кутуһан, хаҥкылыыр сири бэлэм оҥорбуттара. Улахан дьон, ким хаҥкылаах, эмиэ кэлэн хатааһылыыллар. Оттон оҕолору этэ да барбаккын.
Кинилэргэ тугунан да кэмнэммэт үөрүү! Күн аайы манна оҕо-аймах дьоллоох күлүүттэн, үөрүүтүттэн киһи эрэ сүргэтэ көтөҕүллэр.
Билигин оҕолор катоктан арахсыбаттар. Көмпүүтэр, интернет, суотабай төлөпүөн олох да умнулунна!
Вера ТЕРЕНТЬЕВА,
Тумул нэһилиэгин олохтооҕо,
Хаҥалас улууһа.
Хаартыскаҕа төрөппүт Алена Дьячковская түһэриитэ.