Уус Маайа Эдьээнин айар куттаах Аайата
Эдьээн нэһилиэгин кулуубун дириэктэрэ Аайа диэн сахалыы аатын олус сөбүлүүр.
edersaas.ru
— Миэхэ ырыаһыт Ая Яковлева аатын биэрбиттэр. Айар куттаах киһи аатын ылбыт буолан, дууһалыын айар куттаахпын. Бэйэм Кэбээйи Тыайатыттан төрүттээхпин. Эдьээҥҥэ кийииппин. Дьокуускайдааҕы педкэллиэскэ үөрэнэн, муусука учууталын идэтин баһылаабытым. Онтон манна ананан кэлбитим. Кэлин «Култуура киинин салайааччыта» идэни Арктическай институту кэтэхтэн бүтэрэн ылбытым, — диэн кэпсиир түөрт оҕо тапталлаах ийэтэ, култуура киинин дириэктэрэ эдэркээн Аайа Атласова.
Нэһилиэк олохтоохторо бэйэ-бэйэлэрин олус өйөһөллөрүн туоһута – кэнсиэргэ кэтэр таҥастарын дьахталлар бары бииргэ түмсэн тиктэллэр. Сүрүн күүс — эбээлэр кулууптара. Кинилэргэ махтанан ыччаттар дьиэлэригэр тиийэн отторугар-мастарыгар анаан субуотунньуктаан биэрэллэр эбит.
Саамай кэрэхсээбиллээҕэ, кулууп иһигэр нэһилиэк мусуойун аспыттар.
Инньэ гынан кулуупка кэлбит ыалдьыт бу мусуой дьоҕус хоһуттан нэһилиэк историятын билсэн тахсар.
Тыыл бэтэрээннэрин докумуоннара, мэтээллэрэ, сэбиэскэй кэминээҕи иһит-хомуос, 50-с сыллардааҕы истиэнэ араадьыйата, эбэҥкилэр бултуур уонна балыктыыр тэриллэрэ – киһи болҕомтотун тардар.
Аайа Атласова үөрэммит кыһатын — Арктическай институту кытта билигин да ыкса сибээстэһэ олорор. Кини нэһилиэгин айар куттаах дьонун айымньыларынан икки кинигэни бэчээккэ бэлэмнээн, институт иһинэн таһаартарбыт.
Эдэр исписэлиис манан тохтуур санаата суох. Биир дойдулаахтарын туһунан араас ис хоһоонноох кинигэни таһаарар былааннаах. Онон идэтигэр бэриниилээх айар куттаах Аайаҕа санаабыта, толкуйдаабыта барыта туоларыгар баҕарабыт.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.