Муома бильярдистара өрөспүүбүлүкэҕэ биллэн эрэллэр
Дьокуускай куоракка бильярдка Степан Алексеев кэриэһигэр динамичнай пирамидаҕа Саха сирин чемпионатыгар Муома оройуонуттан 15 спортсмен кытынна. Оҕолорго Мичил Хабаров (Орто Дойду) уонна Игнат Никулин (Индигир), эдэрдэргэ Винокуров Вячеслав, Слепцов Василий, Софронов Гавриил (Хонуу), Иванов Василий, Слепцов Василий, Атласов Даниил, Уваровскай Мичил (индигирдэр), Тихонов Дьулус, Соркомов Прокопий (Улахан Чыыстай), Кудрин Дьулустан (Төбүлэх) уонна 60-ҥа диэри саастаах ветераннарга Прокопий Федоров, Виктор Софронов (Хонуу), Андрей Хадаров (Индигир).
Муома бильярдистара үтүө түмүктэннилэр.Оҕолорго Муома спордун историятыгар аан бастакынан Саха Өрөспүүбүлүкэтин чемпионатыгар Мичил Хабаров үрүҥ көмүс мэтээл хаһаайынынан буолла. Бу оройуоммут бильярд спордугар федерациятын улахан ситиһиитэ. Атын да уолаттарбыт сэргэх оонньууну көрдөрдүлэр. Дьулус Тихонов, Даниил Атласов, Василий Иванов өрөспүүбүлүкэ күүстээх оонньооччуларын кыайталаатылар. Өрөспүүбүлүкэ бильярдка спордун федерациятын президенэ А. А. Алексеев бэрт үчүгэйдик оонньоотугут диэн хайҕаата уонна махтанна.
Санатан эттэххэ, 2017 сыллаахха өрөспүүбүлүкэ хоту уонна аграрнай улуустарын икки ардыларыгар хамаанданан чемпионакка оройуоммут бастакы хамаандата үрүҥ көмүс призер, былырыын 2018 сыл Индигир нэһилиэгиттэн Андросов Владимир өрөспүүбүлүкэ күүстээх маастардарын кытта тэҥҥэ оонньоон, боруонса призер буолбута. Быйыл даҕаны муомалар баарбытын биллэрдибит!
Ити барыта биһиги оройуоммутугар бильярд спорда күүскэ сайдыбытын кэрэһэлиир. Муома бильярдистара күүстээх оонньооччулар диэн санаа үөскээтэ. 5-6 сыллааҕыта муомалары улахан ахсааҥҥа ылбат эбит буоллахтарына, билигин күүстээх маастардары кытта эр-биир тэҥҥэ оонньуур кыахтанныбыт. Бу ситиһиилэрбит эмискэ кэлбэтэхтэрэ. Элбэх турнирдарга кыттыы, күрэхтэһиилэри тэрийии түмүгэ.
Былырыын оройуоҥҥа бильярд спордун федерациятын президенэ П.С. Федоров сүүрэн-кѳтѳн, элбэх кэпсэтиини ыытан, Хонууга «Абриколь» диэн ааттаах бильярднай кулууп арыллыбыта. Ол түмүгэр бильярдистар маастарыстыбалара үрдээтэ, оонньуулара сайынна.
Айаннаан иһэн Таатта улууһун сүүмэрдэммит хамаандатын кытта Боробул нэһилиэгэр табаарыстыы көрсүһүү ыытылынна. 3:3 ахсаанынан эйэлээх тэҥнэһии буолла.
Ааптар: А. М. ХАДАРОВ.