“Цветик-семицветик” уһуйаан эбии бөлөҕө аһылынна
“2016-2022 сылларга Саха сиригэр уонна 2026 сылга диэри көрүүлээх “Дьокуускай куорат” уокуругар үөрэҕи сайыннарыы” судаарыстыбаннай бырагыраама иитинэн 203-с микро-оройуоҥҥа 23-с нүөмэрдээх “Цветик-семицветик” уһуйаан эбии бөлөҕүн дьиэтин арыйдылар.
edersaas.ru
Дьиэ 540 кв. миэтэрэлээх, 80 оҕоҕо суоттаммыт, аныгы ирдэбилгэ толору эппиэттиир.
Дьокуускай куорат баһылыгын социальнай боппуруостарга солбуйааччы Наталья Степанова, үөрэх управлениета билиҥҥитэ 2019-2020 сылларга уһуйааҥҥа барар оҕолору хомуйа сылдьарын эттэ. “203-с микро-оройуон балысханнык сайдар, үөрэх тэрилтэлэринэн сөбүгэр хааччыллыахтаах аныгы микро-оройуон буолар. Бу боппуруоһунан Үөрэх уонна наука, Тутуу министиэристибэлэрин кытта кыттыһан улахан үлэни ыыта сылдьабыт”, — диэн Наталья Романовна иһитиннэрдэ.
“Цветик-семицветик” уһуйаан сэбиэдиссэйэ Надежда Климовская эбии бөлөхтөргө М.К.Аммосов аатынан ХИФУ педагогическай институтун уонна С.Ф.Гоголев аатынан Дьокуускайдааҕы педагогическай кэллиэһи бүтэрбит эдэр исписэлиистэр үлэлиэхтэрэ диэн эттэ. “Уһуйааммыт эбии бөлөҕүн историята ол эдэр педагогтартан саҕаланыаҕа”, — диэн бэлиэтээтэ.
“ДСК” АУо генеральнай дириэктэрэ Игорь Гаврилкин үөрүүлээх күҥҥэ мустубут дьону барыларын эҕэрдэлээн туран, сэбиэдиссэйгэ саҥа дьиэ бэлиэ күлүүһүн туттарда. Дьокуускай куорат аатыттан уһуйааҥҥа оҕону сайыннарар оонньуурдары ылыыга сэртипикээти туттардылар.
Дьокуускай куорат уопсастыбаннаһы уонна сонуну киэҥник тарҕатар сириэстибэлэри кытта сибээскэ департамена.
