mediaНамҥа Олоҥхо ыһыаҕын Ытык бэлиэтин көрүстүлэр
Нам улууһун киинигэр, ыам ыйын 14 күнүгэр, М.К. Аммосов болуоссатыгар, Олоҥхо ыһыаҕын Ытык бэлиэтин үөрүүлээх быһыыга-майгыга көрүстүбүт. Ол курдук Ытык бэлиэ Түбэ нэһилиэгиттэн Ленскэй нэһилиэккэ көрсөр үөрүүлээх түгэнэ буолла.
Нам сирин киин болуоссатыгар айар куттаах аламаҕай Айыы аймаҕы айхаллаан, күндэл кэрэ дойдулаах Күн өркөн дьонун уруйдаан, Н.С. Охлопков аатынан улуустааҕы гимназия үөрэнээччилэрин толоруутугар (сал. Сивцева Н.Н.) күпсүүр охсуутунан, хомоҕой хомус дорҕоонунан, үөрүүлээх тэрээһиммит саҕаланна. Эҕэрдэ тылы «Түбэ нэһилиэгэ» МТ баһылыга Константин Федоров, «Ленскэй нэһилиэк» МТ баһылыга Андрей Новгородов эттилэр. Олоҥхо ыһыаҕын Ытык бэлиэтин көрсөр түгэни киэргэттилэр: Н.С. Охлопков аатынан улуустааҕы гимназия үөрэнээччилэрэ (сал. Нюргуяна Сивцева), Хабаровскай куоракка, Венгрия, Сербия дойдуларыгар ыытыллыбыт норуоттар икки ардыларынааҕы фольклорнай фестиваллар кыайыылаахтара «Ньургуһун» народнай үҥкүү коллектива (сал. Мария Попова), үгүс фольклорнай күрэхтэр кыайыылаахтара, бастыҥнара, чаҕылхайдара «Дьырылы», «Дьырылыатта», «Күбэйэ» фольклорнай бөлөхтөр (сал. Елена Маркова), Олоҥхоттон быһа тардан толордо — «Түбэ нэһилиэгэ» МТ баһылыгын солбуйааччыта, СР президенин бириэмийэтин 5 төгүллээх хаһаайына, үгүс республикатааҕы Олоҥхо күрэхтэрин бастыҥа, хас да төгүллээх кыайыылааҕа, Бүтүн Россиятааҕы «Эпосы народов России» күрэх лауреата Петр Попов.
Чаҕыл күннээх үөрүүлээх тэрээһини, оҕо-дьону түмэ тардыбыт оһуохай түмүктээтэ. Үҥкүүнү З.П. Винокуров аатынан Оҕо искусствотын оскуолатын фольклорга преподавателэ Елена Маркова таһаарда. Намылыйар налыы сыһыылардаах, аҥаат -муҥаат алаастардаах, айгыр- силик хатыҥ чараҥнаах, эҥээртэ эҥсиллэр эҥсилгэннээх Эҥсиэли хочотун Намын сиригэр бэс ыйын 20-21 күннэригэр ыытыллаары турар Өрөспүүбүлүкэтээҕи XIII Олоҥхо ыһыаҕар күндү ыалдьыттары алгыстаах түһүлгэҕэ ыҥырдахпыт буоллун!
Ааптар: Наталья Петрова
