«Дыгын оонньууларын» иккис сүүмэрдээһинэ: тутум эргиирэ
Бүгүн уонна сарсын, ыам ыйын 25-26 күннэригэр, Нам улууһун киинигэр стадиоҥҥа «Дыгын оонньууларыгар» кыттарга иккис сүүмэрдиир түһүмэх ыытылла турар. Алта путевка иһин Саха сирин араас муннуктарыттан 49 уол илин-кэлин түсүһэ кэлбит.
Бастакы түһүмэх — «үс төгүл үс» ыстаҥаҕа буолбута. Ол түмүгүн манна ааҕыҥ: http://www.edersaas.ru/nam-syymerdeehin/
Иккис түһүмэх — тутум эргиирэ. Бу көрүҥҥэ өрөспүүбүлүкэҕэ Алексей Уваровскай (Кэбээйи) рекордаах. Ол курдук, Алексей быйылгы Саха сирин многоборьетын чөмпүйэнээтигэр икки мүнүүтэ иһигэр 71-дэ эргийэри ситиспитэ. Алексей быйылгы «Дыгын оонньууларыгар» бастакы сүүмэрдээһини ааһан, путевка ылбыта.
Тутум эргиирэ СӨ рекордсмена — Алексей Уваровскай
Былырыыҥҥы «Дыгын оонньууларыгар» Үөһээ Бүлүүттэн ЧГИФКИС-кэ үөрэнэр Айсен Ботуев 66-тэ эргийэн, эмиэ бэйэтин кэмигэр рекорд олохтообута.
Оттон Намҥа буола турар «Дыгын оонньууларыгар» иккис сүүмэрдээһиҥҥэ 61-дэ эргийэн Чурапчыттан сылдьар Петр Старостин бастаата. Кини кэнниттэн иккис 58-та эргийэн Амматтан Леонид Филиппов буолла уонна Үөһээ Бүлүүттэн Алексей Иванов 57-тэ эргийэн үһүстээтэ.
Тутум эргиирин түмүгэ.
Манна диэн эттэххэ, Петр Старостин уонна Алексей Иванов хас да сыллааҕыта тутум эргииригэр утуу-субуу рекорд олохтообуттара. Оттон быйылгы «Дыгын оонньууларын» бастакы сүүмэрдиир түһүмэҕин тутум эргиирин кытта тэҥнээтэххэ, рекордсмен Алексей Уваровскай 63-тэ эргийэн бастаабыта, Айсен Ботуев 61-дэ эргийэн иккистээбитэ уонна Эрэл Сивцев (Уус Алдан, «Боотур» СК) 56 эргийэн үһүс буолбута. Онон эдэр уолаттар көрдөрүүлэрин иккис сүүмэрдээһиҥҥэ сиппэтилэр.
Мэтээллэр
Салгыы мас тардыһыытын түһүмэҕэ саҕаланна.
edersaas.ru