mediaЧурапчы улууһун биир ытык ыала, Пинигиннэр дьиэ кэргэн, балаҕан ыйын 7 күнүгэр кыһыл көмүс сыбаайбаларын бэлиэтээтилэр. Семен Семенович уонна Валентина Дмитриевна холбоспуттара номнуо 50 сыл буолан, аймахтарын, доҕотторун Чурапчытааҕы “Симиир” банкетнай саалаҕа ыҥыран, үөрүүлэрин үллэһиннилэр.
Семен Семенович сааһын тухары элбэх сиргэ үлэлээбит. Спорт, үөрэҕирии, салалта эйгэлэригэр үгүс өҥөтө сыаналанан “Гражданскай килбиэн” бэлиэнэн наҕараадаламмыт, спорт бэтэрээнэ, дуобакка спорт маастарыгар хандьыдаат, өрөспүүбүлүкэҕэ биллэр-көстөр киһи. Кэргэнэ сааһын тухары музейга үлэлээбит. ССРС култууратын туйгуна, СӨ култууратын үтүөлээх үлэһитэ, “Музей бастыҥ үлэһитэ” бириэмийэ кыайыылааҕа, Чурапчы улууһун бочуоттаах гражданина, “Гражданскай килбиэн» бэлиэ хаһаайына, ытык киһи.
Көмүс сыбаайбаларынан кинилэргэ Ил Дархан Айсен Николаев махтал суруга туттарылынна. Өрөспүүбүлүкэ аҕа баһылыга ити суругар “маннык уһун сыллар усталарыгар эйэ-дэмнээхтик бииргэ олорбут үтүө ыаллар бааллара, эдэр көлүөнэни ыал буолан олорорго угуйар үтүө холобурунан буолар” диэн бэлиэтээбит. Улуус баһылыгын эбээһинэһин толорооччу Алексей Ноговицын бу дьоро киэһэҕэ ыалдьыттаан, көмүс сыбаайбалаахтары эҕэрдэлээн туран, Валентина Дмитриевнаҕа «Саха сирин бочуоттах бэтэрээнэ” бэлиэни туттарда.
Егор КАРПОВ, «Саха сирэ» хаһыат, edersdaas.ru
