Сергей Васильев кыыһа Ньурба дьонугар-сэргэтигэр махталын биллэрдэ
Ньурба куорат күнүгэр анаан бөдөҥ судаарыстыбаннай диэйэтэл, ССРС Суруйааччыларын сойууһун чилиэнэ, П.А. Ойуунускай аатынан Судаарыстыбаннай бириэмийэ лауреата С.С.Васильевы ахтан-санаан ааһар тоҕоостоох. Сергей Степанович 1934 сыллаахха Ньурба оройуонугар Ньурбатааҕы райисполкомҥа бэрэссэдээтэлинэн талыллан үлэлиир. Оччотооҕу эдэр, эрчимнээх салайааччы Бүлүү бөлөх оройуоннарыттан Ньурбаҕа бастакынан уот, төлөпүөн сибээһин киллэттэрбитэ. Култуура-сынньалаҥ пааркатын, уо.д.а тутуулары туттарбыта. «Киэҥ Ньурба» хоһооно оройуоҥҥа гимн буолан ылланар.
Ньурбатааҕы «Норуоттар доҕордоһуулара» түмэлгэ, улуустааҕы киин бибилэтиэкэҕэ Сергей Степанович Васильевка аналлаах тэрээһиҥҥэ төрөппүт кыыһа Вера Сергеевна Васильева, сиэн балта Серафима Серафимовна Илларионова, С.С.Васильев-Борогонскай аатын сүгэр Бороҕоннооҕу кииннэммит бибилэтиэкэ отделын сэбиэдиссэйэ Ольга Николаевна Павлова, хос сиэнэ Айысхаана Васильева күндү ыалдьыт буоллулар. Көрсүһүүнү түмэл салайааччыта Анна Андреевна Туманова иилээн салайан ыытта.
Улуус баһылыга Алексей Михайлович Иннокентьев оройуон сайдыытыгар Сергей Васильев кылгас кэмҥэ туруулаһан үлэлээбит үлэтэ ньурбаларга үрдүктүк сыаналанарын, үйэлэр тухары мэлдьи үтүө холобур буола туруоҕун туһунан эттэ. Кыраайы үөрэтээччи Владимир Иванович Саввинов, улуус Бочуоттаах олохтоохторо Семен Иванович Самсонов, Михаил Иванович Иванов, улуустааҕы бэтэрээннэр сэбиэттэрин бэрэссэдээтэлэ Татьяна Прокопьевна Олесова Сергей Степанович Васильевы истиҥ тылларынан ахтан-санаан аастылар.
Төрөппүт кыыһа Вера Сергеевна Васильева дэлэгээссийэ аатыттан Ньурба дьонугар-сэргэтигэр махтанарын биллэрэн туран, улуустааҕы «Норуоттар доҕордоһуулара» түмэлгэ С.С.Васильев хаартыскаларын альбомун, Сергей Степанович хаамыскалартан оҥорон хаалларбыт оҥоһуктарын бэлэх уунна.
Истиҥ-иһирэх көрсүһүү уопсай хаартыскаҕа түһүүнэн түмүктэннэ.
Ааптар: Антонина СЕМЕНОВА.