Ньурбатааҕы Дьарыктаах буолуу киинэ үлэтэ суохтарга куурустары ыытар
Ньурбатааҕы дьарыктаах буолуу Киинэ үлэтэ суохтарга анаан быйыл Ньурбатааҕы техникумҥа машинист-бульдозеристары, илиинэн иһэрдиигэ электросварщиктары, тырахтарыыстары, Намнааҕы үөрэх Киинин нөҥүө олохтоох преподавателлэринэн иис, парикмахер курдук идэлэргэ үөрэттэрдэ. Маны таһынан, урбаанынан дьарыктанааччылар «Основы предпринимательской деятельности» кууруһугар үөрэннилэр.
Соторутааҕыта Ньурбатааҕы дьарыктаах буолуу киинигэр Дьокуускай куораттан «Статус+» хампаанньа салайааччыта Айталина Николаевна Иванова үлэтэ суохтарга анаан биир нэдиэлэлээх куурус ыытта.
— Ньурбатааҕы дьарыктаах буолуу Киинэ 1С бухгалтерияҕа кууруһу ыытарга куонкурус биллэрбитэ. Биһиги хампаанньа тиэндэри кыайан, эбии профессиональнай үөрэхтээһини ыытарга лиссиэнсийэлээх буоламмыт 1С бухгалтерия, бухучуот, теория, нолуок түһэриигэ, нолуоктаан ылыыга, иккис хайысханан бухгалтерскай өҥөнү оҥорууга, урбаанынан дьарыктанааччаларга «Онлайн-касса» куурустары ыытабыт. Уон үлэтэ суохтар кууруска үөрэннилэр. Ньурбатааҕы дьарыктаах буолуу киинэ инники күөҥҥэ иһэрэ, нэһилиэнньэни кытары ыкса сибээстээхтик үлэлиирэ харахха тута быраҕыллар. Мин санаабар, кууруска сылдьыбыттар элбэҕи биллилэр, астыннылар, — диэн Айталина Николаевна түмүк оҥордо.
Дьарыктаах буолуу Киинэ кэлэр өртүгэр электротэриллэри көрүүгэ-истиигэ, өрөмүөннээһиҥҥэ электромонтер, силиэсэр, «С» категорияҕа, «БЕЛАЗ» ыарахан уйуктаах массыынаҕа суоппардары бэлэмнииргэ куурус ыытарга былаанныыр.
Ааптар: Антонина СЕМЕНОВА.