mediaНьурба агрооскуолалара «Көмүс күһүн-2019» быыстапка-дьаарбаҥкаҕа кытыннылар
Ааспыт нэдиэлэҕэ Ньурба куорат төрүттэммитэ 22-с сылын бэлиэтээһин сэргэхтик ааста. Бу күн Сергей Васильев аатынан култуура сынньалаҥ пааркатыгар «Көмүс күһүн-2019» быыстапка-дьаарбаҥка тэриллэн ыытылынна.
Быыстапка-дьаарбаҥкаҕа Н.Н.Чусовской аатынан Антоновка орто, С.С.Сүүлүскэй аатынан Сүлэ, Ньурбачаан, Н.И.Кочнев аатынан I Хаҥалас агрооскуолалара кыттыыны ыллылар. Сылы эргиччи үлэлиир агрооскуолалар сайыҥҥы үлэлэрин түмүгүн оҕуруот аһын арааһын, сир аһыттан барыанньа араас эгэлгэтин, мүөт, перепёлка сымыытын, хоруолук, коза, кус, индюк уонна да атын көрүҥнэр дьаарбаҥкаҕа көрдөрүүгэ туруорбуттар.
Сүлэтээҕи агрооскуола дириэктэрэ Иван Гаврильевич Тобонов быйылгы үөрэх дьылын кылгастык билиһиннэрдэ:
— Быйыл сайын үс сезоҥҥа лааҕырдар үлэлээтилэр. Лааҕыр оҕолоро сайыҥҥы өттүгэр научнай-практическай кэмпириэнсийэҕэ, «WorldSkills» күрэхтэһиигэ бэлэмнэннилэр.
Оскуолаҕа хортуоппуй олордоммут, 6 туонна курдук үүнүүнү ыллыбыт. 13 төбө ынаҕы, 3 биэни тутабыт. Сайын Сивцевтэр дьиэ кэргэннэрэ окко үлэлээннэр, кыһыҥҥы отунан хааччынныбыт. Кэлэр өртүгэр перепёлкалар базаларын ситэриэхпит.
Куорат күнүгэр аналлаах быыстапка-дьаарбаҥкаҕа кэлэктиибинэн кытта кэллибит. Аны аҕыйах хонугунун Дьокуускай куоракка ыытыллыахтаах быыстапкаҕа кытта бараары бэлэмнэнэбит, — диэн түмүктээтэ.
Антоновкатааҕы агрооскуола производствоҕа дириэктэри солбуйааччы Николай Александрович Николаев:
— Дириэктэрбит Егор Николаевич Тогонохов Амурскай уобаластан ыҥырыа аҕалан, быйыл сайын Куочайга ыҥырыа тутан дьарыктанныбыт. 36 тыһыынча ыҥырыалары тутууга биологтар экологтар үлэлэстилэр. Үс ыҥырыа уйатыттан хас биирдии суоткаттан 3-4 киилэ мүөт ылбыппыт. Ылсыбыт үлэбитин салгыыр санаалаахпыт, — диэн кылгастык билиһиннэрдэ.
I Хаҥалас орто оскуолатын омук тылын учуутала Наталья Владимировна Жданова дьиикэй үүнээйилэри үүннэриинэн дьарыктаналларын, быыстапкаҕа 20 араас үүнээйилэртэн барыанньалары көрдөрүүгэ аҕалбыттарын билиһиннэрдэ.
2000 сылтан Ньурбачааннааҕы агрооскуолаҕа маастарынан үлэлиир Розалия Алексеевна Павлова оскуола оҕуруот аһын, сибэкки арааһын олордуунан дьарыктанарын, кыыллары-сүөллэри иитиигэ производственнай маастар Марианна Ивановна Андреева коза, хоруолук, перепёлка, индюк, цесарка иитиитигэр оҕолору дьарыктыырын туһунан билиһиннэрдэ:
— Биһиги оҕолорбут НПК-ҕа ситиһиилээхтик кытталлар. Николай Яковлев, Аман Николаев «Начинающий фермер» научнай-практическай кэмпириэнсийэҕэ кыттаннар бастакы миэстэни ылары ситиспиттэрэ, — диэн кылгастык кэпсээтэ.
Быыстапкаҕа кытта кэлбит 8-9 кылаас үөрэнээччилэрэ Николай Яковлев, Аман Николаев оскуола завуһа Людмила Семеновна Николаева кыыллары иитиигэ дьарыктыырын туһунан эттилэр. Быыстапканы көрө кэлбит дьоҥҥо улгумнук кыылларын-сүөллэрин, ордук козаны иитии туһалааҕын, үүтэ эмтээҕин туһунан билиһиннэрдилэр.
Үөрэхтэрин бүтэрдэхтэринэ Аман ветеринар, оттон Николай пилот буолуохтарын баҕаралларын эттилэр.
Дьаарбаҥка-быыстапкаҕа «Бастыҥ агрооскуола» кыайыылаахтара билиннилэр. Ол курдук, Татьяна Семеновна Саввинова салайар Ньурбачаан орто оскуолата «Оройуоҥҥа бастыҥ агрооскуола» иккис сылын бастакы миэстэни ылары ситистэ. Н.Н.Чусовскай аатынан Антоновка орто оскуолата (дириэктэр Иван Гаврильевич Тогонохов) — иккис, С.С.Сүүлүскэй аатынан Сүлэтээҕи орто оскуола (дириэктэр Иван Гаврильевич Тобонов) — үһүс, «Барыанньа күнэ» куонкуруска «Бастыҥ барыанньа» номинация хаһаайыннарынан буоллулар.
Күһүҥҥү киһи күлбүтүнэн диэбиттии, бу күн оҕуруот, эт ас арааһын дэлэччи атыылаатылар, мустубут дьон астынан тарҕаста.
Ааптар: Антонина СЕМЁНОВА.
