mediaДьокуускайга Михаил Мегежекскэй аатынан саҥа уулусса баар буолла
Бүгүн СӨ Судаарыстыннаһын күнүгэр Дьокуускай куоракка «Хоту» микро-оройуон саҥа уулуссатыгар Ньурбаттан төрүттээх биллиилээх судаарыстыбаннай уонна уопсастыбаннай диэйэтэл Михаил Мегежекскэй аата иҥэрилиннэ. Саха сирин судаарыстыбаннаһын үөскэтиигэ уонна атаҕар туруорууга Максим Аммосовы, Платон Ойуунускайы, Исидор Бараховы уонна Ньурбаттан төрүттээх Степан Васильевы, бырааттыы Семен-1 уонна Семен-2 Донскойдары, Александр Габышевы кытта бииргэ үлэлээн дьоһун кылаатын киллэрсибит биир дойдулаахпыт үтүө аата үйэтитилиннэ.
Бэлиэ тэрээһиҥҥэ Ил Түмэн Бэрэссэдээтэлин солбуйааччыта Антонина Григорьева, Ил Түмэн сис кэмитиэтин бэрэссэдээтэлэ Владимир Прокопьев, Ньурба улууһун баһылыгын социальнай боппуруостарга солбуйааччыта Анна Уларова, Михаил Мегежекскэй аймахтара Эдуард Данилов, Святослав Николаев, Владимир Мегежекскэй, «Сатал» саад-оҕуруот табаарыстыбатын кыттыылаахтара, Дьокуускайга олорор биир дойдулаахтарбыт уонна Ньурба улууһун дэлэгээссийэтэ кытыннылар.
Бу кэнниттэн тутатына тэрээһин кыттыылаахтара «Комдрагмет» ГУП тиэргэнигэр тиийэн, СӨ Судаарыстыбаннаһын күнүгэр анаммыт үөрүүлээх миитиҥҥэ сырыттылар.
СӨ Бырабыыталыстыбатын Бэрэссэдээтэлин солбуйааччыта Алексей Колодезников, Ил Түмэн Бэрэссэдээтэлин солбуйааччыта Антонина Григорьева, судаарыстыбаннай-партийнай үлэ бэтэрээнэ Эдуард Данилов, Ньурба улууһун эдэр салайааччыларын ааттарыттан улуустааҕы үөрэх управлениетын салайааччытын солбуйааччыта Данил Федоров эҕэрдэ тылын эттилэр. Саха сирин өр сыллаах социальнай-экэнэмиичэскэй сайдыытыгар бэйэтин бэлиэ суолун-ииһин хаалларбыт, Сэбиэскэй Сойуус таһымыгар тиийэ үлэлээбит Степан Васильев пааматынньыгар гирлянда уурулунна.
Ааптар: Геннадий Антонов.
