“Хоту дойду хоһууна” диэн Юрий Готовцев туһунан документальнай киинэ күн сирин көрдө

Кэм-кэрдии аастаҕын аайы үтүө киһи үйэлээх аата уос номоҕо буолан кэнчээри ыччакка кэпсэнэ, ахтылла сылдьара улахан суолталаах. Дьыала салҕаныахтаах, ситим быстыа суохтаах диэн санаанан салайтаран, билигин да үтүө дьон сырдык аатын үйэтитэр үлэ быыстала суох ыытылла турар.
Быйыл алтынньы 7 күнүгэр 1981-1989 сс. Саха АССР эргиэн миниистирэ, 1997-2002 сс. Ил Түмэн норуот дьокутаата, Үлэ уонна социальнай бэлиитикэ кэмитиэтин бэрэссэдээтэлэ, РСФСР эргиэнин, СӨ норуотун хаһаайыстыбатын үтүөлээх үлэһитэ, Өймөкөөн, Муома уонна Орто Халыма бочуоттаах гражданина, судаарыстыбаннай уонна общественнай диэйэтэл Юрий Александрович Готовцев тыыннааҕа буоллар 80 сааһын туолуо этэ.

---

Уопсастыбаннай кэрэспэндиэн, эдэр кыраайы үөрэтээччи Айаал Сивцев-Хоту Уолан иһитиннэрбитинэн, Өймөкөөн ытык киһитэ Готовцев Ю.А. үбүлүөйдээх сылыгар киниэхэ анаан киһи быһыытынан, салайааччы өттүнэн арыйар, киэҥ эйгэҕэ күөх экраҥҥа хатанан хаалар үйэлээх документальнай “Хоту дойду хоһууна” диэн ааттаах киинэ таҥыллан-оҥоһуллан күн сирин көрдө.
Бу киинэҕэ Юрий Готовцев төрөөбүт төрүт дойдутун кэрэ көстүүлээх айылҕата, чугас дьонун, доҕотторун-атастарын, бииргэ үлэлээбит-алтыспыт үөлээннээхтэрин, Ил Дархан Айсен Николаев ахтыылара киирдилэр.
«Киинэ сценарийын оҥорууга миэхэ Р.И. Федоров, Ф.Н. Егорова, С.А. Сюльскай, К.В. Федоров күүс-көмө буоллулар. Киинэ саамай ымпыгын-чымпыгын тиһэҕэр тириэрдэр сыралаах үлэтин — таҥан оҥоруутун дьоҕурдаах дьон Александр Колмогоров уонна Семен Аргунов оҥордулар. Киинэ сүрүн матырыйаалларыгар Юрий Александрович огдообото Матрена Николаевна, Госхранилище дириэктэрэ Бэргэн Парников элбэҕи көмөлөстүлэр. Кинилэргэ барыларыгар өйөбүллэрин иһин улахан махталбын тиэрдэбин», — диир талааннаах ыччат Айаал Сивцев.
Ити курдук Өймөкөөнтөн төрүттээх ытык киһи Ю.А. Готовцев аатын ааттатар, үйэтитэр үлэлэртэн биир дьоһуннааҕынан “Хоту дойду хоһууна” документальнай киинэ буолла.

Ааптар: Надежда КОРЯКИНА