Үөһээ Дьааҥы уолаттара мас тардыһыытыгар ситиһии көтөллөнөн, биир дойдулаахтарын үөртүлэр. Тыа хаһаайыстыбатын академиятын иһинэн алта факультет ректор Кубогын иһин хамаанданан күрэхтэстэ.
Иккис сылын субуруччу агротехническай факультет мадьынылара бастаатылар. Иккис миэстэлэммит техническэй факультет хамаандатыгар киирэн күрэхтэспит Сартаҥтан Герман Слепцов биэс утарсааччытын барыларын 2-0 ахсаанынан кыайталаата. Биирдиилээн түмүккэ 65 киилэҕэ эмиэ Сартаҥтан Денис Старостин, 75 киилэҕэ Герман Слепцов бастакы миэстэҕэ таҕыстылар.
Арассыыйа эр дьоҥҥо сүүмэрдэммит хамаандатын старшай тириэньэригэр Н.Э. Константиновка дьарыктанар мадьыны уолаттарбытыгар өссө үрдүк ситиһиилэри!
Соторутааҕыта Благовещенскай куоракка спорт маастара А. Ковалев кэриэһигэр көҥүл тустууга Бүтүн Арассыыйатааҕы күрэхтэһиигэ бастаан, Арассыыйа спордун маастара буолбут Алексей Мигалкин (Элгэс) бу ааспыт өрөбүллэргэ аны Хабаровскай куоракка 86 киилэлээхтэргэ үһүс бочуоттаах миэстэҕэ таҕыста.
Алексейга аны хапсаҕайын маастарын киниискэтин хайаан да ирдэһэн ыларыгар уонна саҥаттан саҥа ситиһиилэри баҕарыаҕыҥ!
Ааптар: Былатыан ЭВЕРСТОВ