Соболоох оскуолатын үрдүкү кылаастарын үөрэнээччилэрэ түмсэллэр

Соболоох орто оскуолатын 5-11 кылаастарын үөрэнээччилэрэ Ийэ күнүгэр аналлаах маастар-кылаастарга үөрэннилэр. Оҕолор манна сылдьан оҥорбут бэлэхтэрин күндү ийэлэригэр, эбэлэригэр туттардылар. Үрдүкү кылаастар маны тэҥэ уһуйааҥҥа оҕо былаһааккатын атыылаһыыга кыттыстылар.

Соболоох орто оскуолатын эдэр учууталлара Л.Е. Тарабукина, В.М. Новгородов Ийэ күнүгэр оҕолорго маастар-кылаас көрдөрдүлэр. Оҕолор бэйэлэрэ айан таһаарбыт оҥоһуктарын Ийэ күнүн бэлиэтиир кэнсиэргэ туттардылар.

Маны сэргэ оскуола үрдүкү кылаастарын үөрэнээччилэрин хамсааһына уһуйааҥҥа саҥа, аныгы, тупсаҕай көстүүлээх оҕо былаһааккатын атыылаһыыга дискотека тэрийэн сэмэй кылаатын киллэрдэ. Бу кэскиллээх дьыала Улуу Кыайыы 75 сылын көрсө «75 үтүө дьыала» аахсыйа чэрчитинэн оскуола 65 сыллаах үбүлүөйүн, уһуйаан саҥа дьиэтэ тутуллубута 30 сылыгар ананар.

Ааптар: Николай КОРЯКИН.