Өймөкөөн улууһун «ТЗРК» АУо көмүсчүттэрэ алтынньы 20 күнүгэр үлэлии сылдьан, күөл аттыттан куба оҕотун булбуттара.
edersaas.ru
Көтөр көмүсчүттэргэ бэйэтэ тиийэн кэлбит. Үлэһиттэр куба оҕотун ириэрэн, аһатан баран, улуустааҕы ойуур харыстабылын инспекциятыгар аҕалан туттарбыттар.
Орнитологтар быһаарбыттарынан, бу Кыһыл кинигэҕэ киирбит «туундара кубата» эбит.
Айылҕа мааны көтөрүн Дьокуускайга сөмөлүөтүнэн аҕалан, «Орто дойду» зоопаркатыгар туттарыахтаахтар этэ. Ол эрээри зоопарка дириэктэрэ Наталья Сафонова иһитиннэрбитинэн, көтөр сөмөлүөт айанын тулуйбатах. «Орто дойду» зоопарка үлэһиттэрэ аэропорка Өймөкөөнтөн кэлбит кубаны ыла тиийбиттэр. Хоруопканы аһан көрбүттэрэ, «айанньыт» барахсан өлөөхтөөбүт эбит.
Зоопарка дириэктэрэ Наталья Сафонова бэлиэтииринэн, булумньу көтөр саамай кыралара буолан, олох хойут сымыыттан тахсан, ситэ сайдыбатах.
— Төрөппүттэрэ улахан оҕолорун кытта ыраах көтөр кэмнэригэр, кыната ситэ үүмммэтэх, түүлээбэтэх куба барыларыттан хаалан хаалбыт. Ситэ сайдыбатах көтөрдөр үөрдэриттэн хаалар түбэлтэлэрэ үгүс. «Туундара кубатын» бэркэ харыстаан төрөтөн-ууһатан, ахсаанын элбэтэн, Кыһыл кинигэттэн таһаарбыттара. Онон Өймөкөөнтөн кэлиэхтээх кубабыт кыайан быыһаммата, — диэн кэпсээтэ Наталья Владимировна.
Елена ПОТОЦКАЯ, «Саха сирэ» хаһыат, edersaas.ru
Хаартыска — батсааптан.