Таатта ыраах айаҥҥа суоппардара идэлээх күннэрин көрүстүлэр
Таатта ыраах айаҥҥа суоппардарын түмсүүтэ Ытык Күөлгэ «Сарыал» КСК-ҥэ Бүтүн Россиятааҕы суоппардар, тырааныспар үлэһиттэрин күнүн бэлиэтээтэ.
Суоппардары улуус баһылыга М.М.Соров, улуус мунньаҕын бэрэссэдээтэлэ В.А.Охотин, Таатта нэһилиэгин баһылыга Е.И.Павлов, предпринимателлэри өйүүр киин салайааччыта М.Р.Мосоркина, биир идэлээхтэрин «Тааттадальнобой» түмсүү салайааччыта Н.Л.Кутугутов эҕэрдэлээтилэр, өрөспүүбүлүкэ министиэристибэлэрин, ведомстволарын, улуус, нэһилиэк салалталарын наҕараадаларын элбэх суоппарга үөрүүлээх быһыыга туттардылар.
Тэрээһини суоппардар кэргэттэрин ааттарыттан С.С.Игнатьева, Л.С.Кутугутова тэрийистилэр. Суоппардар тэрээһиннэрин «Сарыал» киин уус-уран салайааччыта Светлана Очирова ыытта. Улуус талба талааннаахтарын музыкальнай эҕэрдэлэрин дохсун ытыс тыаһынан доҕуһуоллаатылар.
Суоппардар бэйэлэрин үөрүүлэригэр үгүс сонун күрэхтэри ыыттылар.
Ааптар: Виктор Винокуров.