Муома үөрэнээччилэрин чинчийэр үлэлэрин хайысхата киэҥ
Муома алын сүһүөх оскуолатыгар үөрэнээччилэрэ, төрөппүттэрэ сонун көрсүһүүгэ сырыттылар. Чинчийэр үлэни тэрийэр педагог Валентина Фазульянова ааспыт сыллаахха региональнай уонна республикатааҕы көрүүлэргэ бастаабыт уонна миэстэлэспит оҕолору билиһиннэрдэ.
Бу оҕолор бары “Мин чинчийээччибин” диэн оскуолатааҕы конференцияҕа кыттан уонна онно бастаан салгыы үрдүк таһымнаах көрүүлэргэ бэйэлэрин үлэлэринэн кыттыбыттар.
Аан бастаан V “А” кылаас үөрэнээччитэ Антоев Айсен (салайааччы Антоева А.Н.) леготтан бэйэтэ хамсыыр оҥоһууларын көрдөрөн төрөппүттэр сэҥээриилэрин ылла. Кини леготтан тугу баҕарар айан оҥоруохха сөбүн кэпсээтэ.
Салгыы “Муома таастара” диэн үлэни үөрэнээччилэр бөлөхтөрө (Васильев Артем, Семенов Артур, Черницын Лева – үһүөн III “Б” кылаас оҕолоро, салайааччы Слепцова Мария Ильинична) кыттыһан оҥорбуттарын көрдөрдүлэр. Оҕолор төрөөбүт Муомаларыгар араас таас элбэҕин уонна наадалаах кэмигэр туһалааҕын төрөппүтэригэр кэпсээн астыннардылар.
II “А” кылаас үөрэнээччитэ Вадим Власов (салайааччы Местникова М.Г.) күн-дьыл уларыйыытын сыл устата кэтээбитин, онно туох уларыйыы буолбутун бэлиэтээн испит күннүгүн кэпсээтэ. Төһө да күн, сыл аайы айылҕа уларыйыытын көрө үөрэннэрбит, туох эрэ уратылаах, сонуннаах буоларын Вадим билиһиннэрдэ.
Балыгы иитии куорат ыалыгар да, оҕотугар да улахан сонун буолбатах. Кинилэр иитиллэр декоративнай балыктары аквариумҥа туталларын билэбит. Оттон олохтоох балыгы иитиини улаханнык истэ да, көрө да иликпит. II “А” кылаас үөрэнээччитэ Потапов Вова (сал. Местникова М.Г.) олохтоох балыгы мундуну иитиитэ төрөппүттэр болҕомтолорун тарта. Вова мундуну хайдах туппутун, ииппитин төрөппүттэри сэҥээрдэр гына кэпсээн сэргэхситтэ. Кини балыгы иитиигэ температура, салгын, аһылык тутуһуллара хайаан да наадатын ыйда.
Оҕолор кэннилэриттэн оскуола иитэр-үөрэтэр үлэҕэ завуһа, педагогическай билим кандидата Федорова Ирина Николаевна оҕо чинчийэр үлэтигэр төрөппүт сүрүн оруолу ыларын, болҕомтолоох буоларыгар сүбэлээн эттэ. Салгыы оҕо дакылаатын суруйуутугар, дакылаат тас көстүүтүгэр төрөппүт эмиэ кыттыыны ыларын экраҥҥа көрдөрөн билиһиннэрдэ уонна төрөппүттэр оҕолоро чинчийэр үлэлэригэр кытталларыгар ыҥырда.
Валентина Абдулзьяновна оҕолор чинчийэр үлэҕэ сыстыыларын туһунан санаатын үллэстэр:
– Оҕолор чинчийэр үлэҕэ интэриэстэрин көҕүлүөххэ уонна өйүөххэ наада. Бу өттүгэр төрөппүттэр сөпкө өйдүүллэр. Аны оскуолам салалтата, ордук оскуолам директора Марианна Петровна оҕолор чинчийэр үлэҕэ кыттыыларын сөбүлүүр уонна өйүүр диэммин үөрэбин уонна кинилэргэ тус бэйэм махталбын этэбин, – диэтэ.
Сиһилии «Индигир уоттара» хаһыат нүөмэригэр ааҕыҥ.
Ааптар: Григорий ФЕДОТОВ.