Төбүлэх уоланнара сынньалаҥнарын туһалаахтык атаараллар

Төбүлэх уоланнара сынньалаҥнарын туһалаахтык атаараллар

Төбүлэх орто оскуолатын уоланнара күһүҥҥү сынньалаҥнарын «Байанай-2019» күрэхтэһиинэн саҕалаатылар. Уолаттар оллоон бэлэмигэр, ойбону алларыыга, чэйи оргутууга, салаасканан соһууга, балыктааһыҥҥа, сыалы ытыыга, викторинаҕа, туут хайыһарынан сүүрүүгэ, хомуур хапсаҕайга кииристилэр. 

Бастакы хамаанда (хамандыыр – Петя Никулин, 11 кылаас, сал. Никулин И. А.), иккис хамаанда (хамандыыр – Лёня Соркомов, 9 кылаас, сал. Соркомов И. Е.) 9 түһүмэххэ куоталастылар. Күрэхтэһии быыһыгар минньигэс амтаннаах миин истилэр.

Бэрт эрийсиилээх, сүүрүүлээх-көтүүлээх, сымса туттунуулаах, кыраҕы харахтаах түһүмэхтэр кэннилэриттэн бастакы хамаанда (хам. Петя Никулин) инники түстэ, иккис – Лёня Соркомов хамаандата буолла. Кинилэргэ мэтээл, харчынан бириэмийэ туттарылынна.

Маны таһынан улахан балыгы хаптаран Кирилл Егоров, бастакы балыгы хаптаран Ярик Старков бириис ыллылар. Бу тэрээһини тэрийэллэригэр Төбүлэх орто оскуолатын кэлэктиибэ спонсордаабыт олохтоох дьаһалтаҕа, сынньалаҥ дьиэтин үлэһиттэригэр, саастаах дьон түмсүүлэригэр уонна Муоматааҕы РЭС профкомугар (Каратаева И. Е.) махтал бастыҥын тириэрдэр.

Ааптар: Людмила СТРУЧКОВА