“Музыкальнай Булуҥ – 2019” биир нэдиэлэтээҕи түбүктээх үлэтин түмүктээтэ. Бу бырайыак Тиксиигэ алтынньы 31 күнүттэн үлэтин саҕалаабыта.
Ол курдук сэтинньи ый маҥнайгы күнүгэр үөрүүлээх быһыыга-майгыга айар-тутар оскуолаҕа үлэлии кэлбит ыалдьыттары сахалыы уруйдаан-айхаллаан көрсөн, алгыс тыла этиллэн Культурнай-спортивнай комплекска оскуола аанын тэниччи арыйбыта. Кэнсиэргэ маҥнайгы уонна иккис нүөмэрдээх Тиксиитээҕи искусство оскуолаларын талааннаах иитиллээччилэрэ көхтөөх кыттыыны ылан олус диэн киэргэппиттэрэ. Улуус баһылыга Игорь Владиславович Кудряшов кэлбит ыалдьыттарга түмүктээх, таһаарыылаах үлэни, табыллыыны, онтон үөрэнээччилэргэ ситиһиини баҕарарын биллэрбитэ.
Саха Өрөспүүбүлүкэтин култууратын туйгуна, Музыка үрдүкү оскуолатын уонна “Музыка барыбытыгар» бырайыак исписэлииһэ, үөрэтэ кэлбит учууталлар бөлөхтөрүн салайааччыта Евдокия Семеновна Карманова этэринэн, Михаил Ефимович Николаев саҕалааһынынан “Музыка барыбытыгар» бырайыак чэрчитинэн “Арктика эдэр талааннара”диэн бырайыактаахтар эбит. Үүнэр көлүөнэ фондатын грааннарын сүүйэн Арктика улуустарын кэрийэ сылдьан учуталларга күүс-көмө, анал семинардары, маастар-кылаастары уонна үлэҕэ көмө матырыйааллары тарҕаталлар. Туһаайан Хоту улуустарга талааннаах оҕолору көрөн-истэн, сыымайдаан талан Музыка үрдүкү оскуолатыгар ыҥырабыт диир.
– Биһиги Тиксиигэ 2017 сыллаахха кэлэн флейтаҕа мастер-кылаас, музыка учууталларыгар, култуура үлэһиттэригэр бэйэ идэтин үрдэтинии куурустарын ыыппыппыт. Оскуолалары уонна оҕо уһуйааннарын кэрийэ сылдьан сүүмэрдээн олус талааннаах оҕолору булан көрөн Музыка үрдүкү оскуолатыгар ыҥырбыппыт эрээри, биир да оҕо кэлбэтэҕэ.
Онтон бу быйылгы сыалбыт туолла диэн үөрэн олоробун. Булуҥ улууһугар кэлиэхпит иннинэ номнуо түөрт улууска айар-тутар оскуолабыт үлэтин ыыппыппыт. Маҥнай Эдьигээн улууһуттан саҕалаабыппыт, онтон Өлөөн, Анаабыр улуустарыгар ыыппыппыт. Онтон дьэ быйыл Булуҥмутун буллубут. Араас кэккэ биричиинэлэринэн сайыҥҥы кэмҥэ буолбакка, кыһыҥҥы бириэмэҕэ табылынна. Икки сүүстэн тахса оҕону үөрэттибит.
Оҕолор олус дьаныардаахтык дьарыктанан үөрэннилэр, саамай сөхпүппүт диэн, олус аһаҕас оҕолор эбит, бу оҕо сатаабат диэн сэмэлээбэккэ бэйэ-бэйэлэригэр көмөлөһөллөр, онон үлэбитин да чэпчэтэн биэрдилэр. Оҕолору фортепианаҕа, гитараҕа, балалайкаҕа, домраҕа, хорунан ыллааһыҥҥа уонна синтезаторга үөрэттибит.
Түөрт сылы быһа тэҥҥэ үлэлэспит, этэргэ дылы уопуттаах сэттэ учутал кэлэн үлэлээтэ. Кинилэр хайдах кылгас бириэмэҕэ үөрэтэри билэллэр, онон тутатына результакка үлэлииллэр. Биир-икки нэдиэлэҕэ тугу үөрэтиэххэ сөбүй диэн дьон үксэ ыйытар буолуохтаах. Ону мин маннык диэхпин баҕарабын, музыкаҕа эрэ буолбакка, култуураҕа да сыһыаннаах оҕо биһиги уопсастыбабытыгар туһалаах, киэҥ көрүүлээх, сатабыллаах оҕо буолар. Онтон өссө хайа эрэ инструмеҥҥа икки илиитинэн оонньуур буоллаҕына, оҕо өйө сайдарын наука дакаастаабыта. Онон биир да нэдиэлэ иһигэр буоллар, былааммытын толордубут диэхпин сөп. Хомойуох иһин, улахан дьон үөрэммэтэ, дьарыктаммата, тоҕотун сэрэйдэхпинэ кыбыһыннылар быһыылаах. Онон үс саастарыттан саҕалаан 18 саастарыгар диэри хабан үлэлэстибит. Хас да оҕону бэлиэтии көрдүбүт, Музыка үрдүкү оскуолатыгар ыҥырыыбытыгар сөбүлэһиэхтэрэ диэн эрэнэбит.
Түгэнинэн туһанан, бу бырайыакпытын өйөөн-өйдөөн улуус баһылыга Игорь Владиславович, култуура управлениетын начаалынньыга Ольга Победовна, Тиксиитээҕи исусство оскуолатын дириэктэрэ Лилия Алексеевна эрдэттэн былааннаан, барытын бэлэмнээн, биһигини көрсөн, тэҥҥэ үлэлэһэннэр бырайыакпыт олус таһаарыылаахтык үлэлээн хамсаата дии санаатыбыт. Булуҥ улууһун олохтоохторугар, култуура уонна үөрэҕирии салааларыгар, үлэһиттэригэр, Тиксиитээҕи искусство оскуолатын үлэһиттэригэр барҕа махталбытын тиэрдэбит.
Биир нэдиэлэтээҕи айар-тутар “Музыкальнай Булуҥ – 2019” оскуола үлэтин түмүгүнэн сэтинньи 7 күнүгэр Култуурунай-спортивнай комплекска кэнсиэр тэрийэн ыытта. Оҕолор туохха үөрэммиттэрин, талааннарын көрдөрөн дьон дьүүлүгэр таһаардылар, хайҕабылы ыллылар.
Дарина ЧАБЫЕВА
Ааптар хаартыската