Чуумпу Кытыл сынньалаҥ дьиэтин үлэһиттэрэ Сомоҕолоһуу сылыгар анаан тэрилтэлэр икки ардыларыгар күрэхтэһиини тэрийдилэр. Кинилэр маннык бэртээхэй тэрээһини үһүс сылларын ыыталлар.
Аан бастаан чуумпу кытыллар 2015 сыллаахха Сомоҕолоһуу күнүгэр Грузия, Молдавия, Индия, Япония, Украина, Узбекистан норуоттарын, иккис 2016 сыллаахха Алжир, Африка, Америка индеецтэрин, Испания, Шотландия норуоттарын көрдөрбүттэрэ. Быйыл 4 тэрилтэ күөн көрүстэ, ол курдук олохтоох дьаһалта, ФАП — Франция, Төбүлэх орто оскуолатын учууталлара — Мексика, «Сулусчаан» уһуйаан үлэһиттэрэ — Египет, олохтоох ОДьКХ үлэһиттэрэ — Кытай дойдуларын билиһиннэрдилэр.
Бастакы түһүмэххэ талан ылбыт омуктарын тылынан саҥараллар, таҥастарын көрдөрөллөр уонна бу норуот биир биллэр көстүүтүн оҥоһук оҥорон кэпсииллэр, иккискэ омуктарын ырыатын-үҥкүүтүн, сиэрин-туомун кэпсииллэр, көрдөрөллөр, үһүскэ омуктарын киинэтин сахалыы тылбаастаан саҥараллар. Күрэхтэр быыстарыгар урукку тэрээһиннэри видеонан көрдөрдүлэр. Оттон оҥоһуктарга Франция Эйфель башнятын, Мексика пирамидатын, кактуһу, Китай Будда, Египет Сфинкс үс пирамидалары кэтиирин туруорбуттар. Бу күрэхтэһиигэ көрөөччүлэр сыана биэрдилэр, ол курдук инники күөҥҥэ ОДьКХ, иккис орто оскуола, үһүс «Сулусчаан» уһуйаан, төрдүс олохтоох дьаһалта, ФАП буоллулар. Барыларыгар харчынан бириэмийэ, добун суруктар туттарылыннылар. Маны таһынан, Төбүлэх орто оскуолатын үөрэнээччилэрин өрөспүүбүлүкэтээҕи флэшмобка кыттыбыт проекцияларын көрдүлэр.
* * *
«Сулусчаан» уһуйаан иитээччилэрин, иитиллээччилэрин уонна төрөппүттэр күүстэринэн Сомоҕолоһуу сылыгар «Орел и решка» күрэхтэһии буолан ааста. Күрэҕи ыытааччылар Настя Ивлеева / төрөппүт Никулина А.П./ уонна Антон Птушкин /төрөппүт Винокуров А.С./ иилээн-саҕалаан ыыттылар. Кинилэр бары кэлбит ыалдьыттары, кыттааччылары эҕэрдэлээтилэр, Азия уонна Европа сэттэ араас кэрэхсэбиллээх дойдуларынан күүлэйдэтэ ыҥырдылар. Бастаан Казахстан – кыра бөлөхтөр /төрөппүт Герасимова Т.П., оҕолор Марик Вензель, Витя Алексеев, Инесса Герасимова / киирдилэр, визиткалара видеонан көһүннэ, үҥкүүлээтилэр, таҥастарын көрдөрдүлэр. Салгыы Греция – орто, кыра бөлөхтөр / төрөппүт Корякина А.Н., оҕолор Алиса, Маша Корякиналар, Уля Винокурова, Максим Корякин/, Белоруссия – орто бөлөх / төрөппүт Никифорова С.С., оҕолор Талбан Никулин, Руслан Никифоров, Розанна Старкова, Вика Нучеканова/, Испания – улахан бөлөх /төрөппүт Ларева Ю.Я., оҕолор Дарианна Егорова, Агния Стручкова, Вадим Корякин, Айтал Слепцов/, Индия – улахан бөлөх / эбээ Попова В.В., оҕолор Амелия Левина, Виктория Стручкова, Алена Тимофеева, Глеб Вожжов/. Чеченскэй өрөспүүбүлүкэ – бэлэмнэнии бөлөх /төрөппүт Стручкова А.А., оҕолор Леня Старков, Алеша Стручков, Коля Нучеканов/, Корея – бэлэмнэнии бөлөх /төрөппүт Гуляева И.А., оҕолор Анюта Гуляева, Сулустаан Никулин, Эрсаан Старков/. Бэрт кэрэхсэбиллээх, олус үчүгэй таҥастаах-саптаах, үҥкүүлээх-битиилээх түһүмэхтэр кэннилэриттэн дьүүллүүр сүбэ бастакы миэстэни Индия хамаандатыгар биэрдэ, иккис – Корея, үһүс – Греция. Кыайбыт хамаандаларга минньигэс туорт туттарылынна, атыттарга барыларыгар минньигэс сакалаат. Маны таһынан оскуола өрөбүлүн кэмигэр сахалыы остуол оонньууларыгар — тырыыҥкаҕа, хабылыкка, хаамыскаҕа күрэхтэстилэр. Кыттыбыт бэлэмнэнии бөлөх оҕолоругар Никулин Сулустааҥҥа, Нучеканов Коляҕа, Стручков Алешаҕа, Старков Леняҕа, Гуляева Анютаҕа сертификат туттардылар. Бары кыттыбыт төрөппүттэргэ, эбээлэргэ, эдьиийдэргэ, сынньалаҥ дьиэтин үлэһиттэригэр көмөлөрүн иһин «Сулусчаан» уһуйаан үлэһиттэрэ махтал тылларын тиэрдэллэр.
Ааптар: Л. СТРУЧКОВА.