Хонуу асчыт ийэлэрэ сатабылларын көрдөрдүлэр
Кииннэммит библиотекаҕа Муома оройуонун дьахтар Сэбиэтин тэрийиитинэн туорт оҥоһуутугар, киэргэтиитигэр маастар-кылаас ыытылынна. Билигин сир-сир аайы төлөбүрдээх маннык дьарыктар тарҕаммыт кэмнэригэр бу тэрээһин босхо буолан биэрдэ.
Уопуттаах хаһаайкалар, сүрүн үлэлэрин таһынан ас астааһынынан сөбүлээн дьарыктанар М.Д. Атласова, Д.С. Захарова мустубут дьоҥҥо туорду оҥорууга, киэргэтиигэ бэйэлэрин сатабылларын үллэһиннилэр, крем арааһын оҥорон туорду хайдах быһыылаахтык киэргэтэри көрдөрдүлэр.
Хаһаайкалар, ыал ийэлэрэ түгэни мүлчү туппакка үгүс ыйытыылары биэрдилэр. Саҥаны-сонуну билэн, үгүскэ үөрэнэн, чугас дьоннорун минньигэс аһынан күндүлүүр санаалаах үөрэн-көтөн тарҕастылар.
Валентина СТАРОСТИНА.