Сэтинньи 10 күнүгэр Кремль дыбарыаһыгар Арассыыйа ис дьыалатын үлэһиттэригэр аналлаах күҥҥэ улахан бырааһынньыктааҕы кэнсиэр буолан ааспыта. Бары билэрбит курдук, СӨ Ис дьыала министиэрстибэтин үлэһиттэрэ “Служба 02” ырыа ансаамбыла кыттыыны ылбыта. Кинилэр Иннокентий Васильев – Лэгэнтэй “Улахан ыһыах” ырыатын толорбуттара. Нүөмэр С.Зверев аатынан үҥкүү театрын артыыстарын кытта тэҥҥэ туруоруллубут. Ыһыаҕы аһар Аар тойон оруолун – эмиэ биир дойдулаахпыт Ильяс Заровняев Амма улууһун полициятын үлэһитэ буолбут.
“Служба 02” ырыа ансаамбылыгар биһиги биир дойдулаахпыт, Солоҕон нэһилиэгиттэн төрүттээх Надежда Гаврильевна, Иннокентий Иннокентьевич Михайловтар уоллара Исай Михайлов кыттыыны ылан кэллэ. Бу туһунан биһиги Исайдыын төлөпүөн нөҥүө кэпсэттибит:
– 2017 с. “Якутское” патрульно-постовой батальоҥҥа үлэлии киирбитим, дуоһунаһым сержант полиции. Ол сайын Туймаада ыһыаҕар полициялар икки ардыларыгар ырыа күрэҕэ буолбутугар үлэм аатыттан кыттыбытым. Куонкурус кэнниттэн Юта Станиславовна Асикритова “Служба 02” ырыа ансаамбыл салайааччыта бэйэтигэр ыҥырбыта, онтон ыла бу 2 сыл ансаамбылга сөбүлээн сылдьабын. Саха НКИК “Саҥа күн” биэриитигэр кытта сылдьыбыппыт. Бу сайын Волгоград куоракка бүтүн Арассыыйатааҕы “Щит и лира” бэстибээлгэ кыттан, I истиэпэннээх лауреат буолары ситиспиппит. Онтон балаҕан ыйыгар дьэ, Москубаҕа улахан кэнсиэркэ барарбытын Юта Станиславовна эппитэ, биһиги бары үөрүү бөҕө. Ансаамбылга 10-быт.
Мин оҕо эрдэхпиттэн ыллыырбын ордоробун. Сөбүлүүр дьарыккар син быыс-арыт булан сылдьаҕын. Өрөбүллэрбэр, сороҕор үлэбиттэн көҥүллэтэн да репетицияҕа барабын, ыллаан сынньанабын. Олоҕум аргыһа Лена маннык эппиэтинэстээх үлэҕэ сылдьан өссө быыспар ырыа ыллыырбын өйүүр уонна өйдүүр. Онтон икки кырачаан кыргыттарым аҕалара ыллыырыттан үөрэллэр эрэ. Кинилэргэ махталым муҥура суох.
Полицияҕа туттарсыан баҕалаах оҕолорго доруобуйаҕытын оскуолаттан көрүнүҥ, спорду өрө тутуҥ уонна “бу үөрэххэ хайаан да киириэхтээхпит” диэн сыал-сорук туруорунан БКЭ-ҥэ күүстээхтик бэлэмнэниҥ.
Юлиана Макарова.