«Биһиги – Арассыыйа кэскиллэрэбит!” бырайыак туһунан” Саха Өрөспүүбүлүкэтин Ил Дархана Айсен Николаев Ыйааҕа бүгүҥҥүттэн ыла олоххо киирэр.
edersaas.ru
Бу Ыйаах тахсыытын үгүс киһи олус үөрэ, сэргии көрүстэ. Ол туһунан санаатын оҕо аймаҕы, ыччаты иитиигэ баҕа өттүнэн үлэлии сылдьар, “Патриот” өрөспүүбүлүкэтээҕи уопсастыбаннай хамсааһын салайааччыта Михаил Люй Ден солбуйааччыта, Арассыыйа Суруналыыстарын сойууһун чилиэнэ Зинаида Игнатьеваттан ыйыталастым.
«Патриот» өрөспүүбүлүкэтээҕи хамсааһыны тэрийээччилэр уонна кыттааччылар
“Биһиги ити хайысхаҕа 2009 сылтан үлэлэспиппитинэн өссө төгүл киэн тутта санаатым. Ол курдук, «Патриот» өрөспүүбүлүкэтээҕи уопсастыбаннай хамсааһын (уруккута «Зарница») байыаннай-спортивнай оонньууну аан бастаан Сунтаарга тэрийэн ыыппыппыт. Ол оонньуу кэнниттэн куоракка кэлэн, ыччаты дойдуга тапталга иитэргэ “төгүрүк остуол” тэрийбиппит. Онно начаалынай байыаннай бэлэмнэнии предметин оскуола бырагырааматыгар киллэрэри туруорсубуппут. Тоҕо диэтэххэ, пионер, хомсомуол суох кэмнэригэр, оҕолору аҕа көлүөнэ үтүө холобуругар иитэргэ, өй санаа өттүнэн сайыннарарга, эт-хаан өттүнэн чэгиэн-чэбдик буоларга, оҕону төрөөбүт дойдутугар бэриниилээх буола иитэргэ оскуолаҕа үөрэтиллэр предметтэртэн чуолаан ити предмет саамай чугас этэ.
Бу хайысхабытынан уон сыл үлэлээн кэллибит, “Патриот” байыаннай-спортивнай оонньууну кэнники икки сылга Бүлүү бөлөх улуустарыгар ыыттыбыт. Аҕа көлүөнэ үтүөкэн дьонун, ситиһиилээх үлэлээх тэрилтэлэри үйэтитэр ис хоһоонноох ыстатыйалары, кинигэлэри таһаарыыга үлэлэһэн, быйыл 26-с кинигэбитин таһаардыбыт. Куоракка үрдүк үөрэххэ киирбит оҕолорго сүбэ-ама биэрэн, көмө оҥоробут.
Онон, ыччаттарбытын кытары үлэлэһэ сылдьар дьон буоларбытынан, оҕо, эдэр ыччат бары өттүнэн сайдыылаах буоларыгар көмөлөөх Ыйаах кэмигэр тахсыбытын уруйдуубут-айхаллыыбыт”.
Надежда ЕГОРОВА, “Саха сирэ”, edersaas.ru