Бүлүүлэр ыалга мустан олоҥхо иһиттилэр
Бүлүү улууһугар олоҥхо декадата ыытыллар. Былыргы курдук, ыалга мустан олоҥхону истии салҕанар. Бу сырыыга Прасковья Семеновна Егорова дьиэтигэр буолла.
Бүлүүгэ Олоҥхо дьиэтин иһинэн үлэлиир Владимир Николаев салайар «Ыллык» түмсүү сэттэ киһитэ Прокопий Максимов «Ала Буурай аттаах Алтан Дьааһын Бухатыыр» олоҥхотуттан быһа тардан толордулар. Олохтоохтор Чинэкэҕэ олорбут биир киэн туттар олоҥхоһуттарын айымньытын «ноо» диэн сэргии иһиттилэр.
Прасковья Семеновна Егорова дьиэтигэр олоҥхону истэ кини дьиэ кэргэттэрэ, чугастааҕы ыаллара, табаарыстара муһуннулар. Хаһаайка ыалдьыттары сахалыы астаах-үөллээх көрүстэ, олоҥхону истиини тэрийиигэ улахан көмөнү оҥордо. Киниэхэ барҕа махтал тылларын эттилэр.
Байанай ыйын биир дьоро киэһэтигэр «Олоҥхо ассоциацията» өрөспүүбүлүкэтээҕи уопсастыбаннай тэрилтэ Бүлүү улууһунааҕы салаатын бэрэссэдээтэлэ Тамара Степанова, улуус уопсастыбаннай түмсүүлэрин үлэлэрин сүрүннээн салайааччы Мария Томская кытыннылар.
Ааптар Николай ФЕДОРОВ.