Хатас кырачааннара дьааһылаланнылар
Хатаска, үһүгэр диэри саастаах кырачааннарга анаан, оҕо саадыгар эбии бөлөх аһыллыбыт. Бу туһунан биһиэхэ Дьокуускай куорат дьаһалтатын Уопсастыбаннаһы уонна иһитиннэрэр маассабай сириэстибэлэри кытары үлэлэһэр департаментан иһитиннэрдилэр.
Бэҕэһээ, тохсунньу 27 күнүгэр, Хатаска «Кэрэчээнэ» 70-с №-дээх оҕо саадыгар «Сир симэхтэрэ» диэн кырачааннарга аналлаах эбии бөлөх аһылынна. Дьааһылаҕа сылдьар саастаах кырачааннар ахсааннара онон 120 тиийэрэ бэлиэтэннэ. Бу үөрүүлээх бэлиэ түгэҥҥэ СӨ Ил Дархана Айсен Николаев, СӨ бырабыыталыстыбатын бэрэссэдээтэлин солбуйааччы Ольга Балабкина, Дьокуускай куорат баһылыга Сардаана Авксентьева, Дьокуускай куорат Дууматын бэрэссэдээтэлэ Альберт Семенов уонна солбуйааччыта Евдокия Евсикова ыалдьыттаатылар диэн суруйаллар.
Оҕо саадын саҥа эбии тутуута хаачыстыбалаах уонна куттала суох матырыйаалынан, аныгы уот тэрилинэн оҥоһулунна. Оҕолор астына оонньуулларыгар, дуоһуйа утуйалларыгар, ыраастык сууналларыгар-тарааналларыгар аналлаах хостор, ыскааптар, биир тылынан эттэххэ, усулуобуйа барыта тэрилиннэ дииллэр.
Куорат мэрэ Сардаана Авксентьева оҕо саадын кэлэктиибин, төрөппүттэри уонна кырачааннары саҥа дьиэлэммиттэринэн истиҥник эҕэрдэлээбит уонна наадалаах, туһалаах малы-салы ылалларыгар сэртипикээт туттарбыт. «Кырачааннарбыт саамай үчүгэй, табыгастаах усулуобуйаҕа улааталларыгар, үөрэнэллэригэр, сайдалларыгар улахан болҕомто ууруллар. Былырыын Сыырдаах сэлиэнньэтигэр эбии бөлөх арыллыыта бу куорат таһынааҕы бөһүөлэктэр тэҥҥэ сайдалларыгар үлэ ыытылларын туоһулуур. Хатас сайдан, кэҥээн, ыалын ахсаана, оҕо төрөөһүнэ элбээн иһэрэ бэлиэтэнэр. Онон «Сир симэхтэрэ» эбии бөлөх наадалаах, тоҕоостоох кэмигэр арылынна», — диэн үөрүүтүн үллэстибит.
Оҕо саадын кэлэктиибэ, төрөппүттэр өрөспүүбүлүкэ уонна куорат салалтатыгар оскуолаҕа киириэн иннинээҕи саастаах оҕолору көрүү-истии, үөрэтии-иитии хайысхатыгар болҕомтолорун, өйөбүллэрин иһин махтаммыттар. «Улахан үөрүүлээх уонна умнуллубат бэлиэ түгэн. Кырачааннары ыларга номнуо бэлэммит» , — диэбит оҕо саадын сэбиэдиссэйэ Галина Николаева.
Хаартыскалар: Дьокуускай куорат дьаһалтатын уопсастыбаннаһы уонна иһитиннэрэр маассабай сириэстибэлэри кытары үлэлэһэр Департамент
