Уус Алдан Бороҕонугар түөртүү кыбартыыралаах икки дьиэ тулаайахтарга ананна
Уус Алдан улууһугар 2009 сылтан судаарыстыбаннай боломуочуйа бэриллэн, тулаайах оҕолору дьиэнэн хааччыйыы ыытыллар. 2018 сылга көрүллүбүт үбүнэн түөртүү кыбартыыралаах икки саҥа дьиэ ананан тутуллан бүттэ.
Тосхунньу 31 күнүгэр Бороҕоҥҥо икки саҥа дьиэҕэ аҕыс тулаайах кыбартыыра күлүүһүн тутта. Уус Алдан улууһун дьаһалтатын баһылыгын I солбуйааччыта Петр Попов саҥа дьиэҕэ киирээччилэргэ үтүө баҕа санааны тириэртэ.
“Уус Алдан улууһун муниципальнай тэриллии дьаһалтатын аатыттан барыгытын саҥа, сырдык, ыраас, сылаас дьиэҕэ киирэр күҥҥүтүнэн итиитик-истиҥник эҕэрдэлиибин. Бэйэтэ олбуордаах, олус үчүгэй хаачыстыбалаах, сылаас дьиэлэр тутулуннулар. Аттыгар кыракый көлүччэлээх. Баҕарыам этэ бу дьиэлэргэ киирэҥҥит, холумтаҥҥыт сылаас, ыраас буоларыгар. Бэйэ-бэйэҕитин харыстаһан, өйдөһөн эйэ дэмнээхтик олоруоххут диэн эрэнэбин”, — диэтэ кини.
Ааптар: Айаал Молокотин