Ньурба учуутала Арассыыйа педагогтарын күрэҕэр абсолютнай чемпион аатын ылла
А.Н.Чусовской аатынан Ньурбатааҕы техническэй лицей физикаҕа учуутала Юрий Афанасьевич Лазарев Москуба куоракка үөрэҕирии тэрилтэлэрин үлэһиттэрин бастакы Арассыыйатааҕы Чемпионатыгар муҥутуур кыайыылааҕынан таҕыста.
Алтынньы 31 күнүттэн сэтинньи 3 күнүгэр диэри Москуба куоракка үөрэҕирии тэрилтэлэрин үлэһиттэрин бастакы Арассыыйатааҕы Чемпионатыгар Ньурба улууһун 44 сыл ыстаастаах учуутала үлэтин уопутун ситиһиилээхтик көрдөрдө. А.Н.Чусовской аатынан Ньурбатааҕы техническэй лицей физикаҕа учуутала Юрий Афанасьевич Лазарев бу күрэххэ «Педагогическай маастарыстыба чемпиона» ааты ылан, дипломунан, «Үтүө сүрэх», «Үлэ мэтээлэ» мэтээллэринэн наҕараадаланна. Юрий Афанасьевич үөрэхтээһини тарҕатыыга бастыҥ уопута күрэххэ көрдөрүүгэ тэҥнээҕин булбата.
Ааптар: Антонина СЕМЕНОВА.