Муоматааҕы полиция отделениета идэлээх күнүн үлэ үөһүгэр көрсөр
Ханнык да кэмнэргэ ис дьыалалар уорганнарын үлэһиттэрин баһыйар өттө биһиги киэн туттуубут уонна эрэллээх дурдабыт-хаххабыт. Ол иһигэр хорсун дьоммут идэтигэр бэриниилээх А.Е. Хохолов, В.З. Елкин, В.В. Бурцев хорсун быһыылара үйэлэргэ өлбөөдүйбэт. Муоматааҕы полиция Отделениетыгар бүгүн Чечня сэриитин 4 кыттыылаахтара үлэлииллэр: оперативнай дьуһуурунай А.В. Оконосов, участковай В.И. Иванов, холуобунай розыск оперуполномоченнайа М.М. Алексеев, РЛС отделга О. А. Кириллин.
Муома улууһугар төрөөбүт да, кэлэн үлэлээн, бур-буруо таһаарынан, ыал буолан да хаалбыт ис дьыала уорганнарын бэтэрээннэрэ бааллар. Сорохторо араас эйгэҕэ наадалаах идэлэри баһылаан, улуустарын өрө көтөҕө боччумнаахтык үлэлии-хамсыы сылдьаллар.
Бырааһынньыгы көрсө Муоматааҕы полиция Отделениетын начальнигын эбээһинэһин быстах кэмҥэ толорооччу, полиция капитана Алексей Васильевич Оконосовтыын кэпсэтиини эһиги болҕомтоҕутугар таһаарабыт.
– Алексей Васильевич, бастатан туран, эйигин уонна бииргэ үлэлиир коллегаларгын, кэлэн иһэр идэлээх бырааһынньыккытынан итиитик-истиҥник эҕэрдэлиибит. Бу полиция күнүн хайдах быһыылаахтык, ис туруктаах көрсөөрү сылдьаҕыт?
– Махтал буолуохтун, биһиги настырыанньабыт үчүгэй. Түбүктээх үлэбит биир да мүнүүтэҕэ тохтообот. Оройуоҥҥа бэрээдэги харыстааһын туруга биһигиттэн тутулуктаах. Каадыр боппуруоһун таарыйдахха, вакансия кэм да элбэх. Биллэрин курдук, ис дьыала органнарын үлэһиттэригэр ирдэбил күүстээх. Ол курдук үлэҕэ киирээччи психологическай тургутууну, анал бэрэбиэркэни, доруобуйаны көрдөрүүнү, түөрт ыйдаах бэлэмнэниини ааһар. Анал бэрэбиэркэ претендент сууттана сылдьыбыт дуу, суох дуу, бэл диэтэр, административнай эппиэтинэскэ тардыллыбыт түгэнэ баарын кытта быһаарар. Ити эрэ кэнниттэн үлэҕэ киириллэр. Ол иһин өрөспүүбүлүкэ үгүс оройуоннарыгар каадырдар тиийбэттэр, биһиги улууспутугар эрэ буолбатах. Кырдьыгынан, Муоматааҕы полиция Отделениетыгар үгүстэрэ кэлии дьон үлэлииллэр. Бу үлэһиттэр бары ирдэбилгэ толору эппиэттииллэр, бэйэлэрин дьыалаларыгар эппиэтинэстээхтэр уонна профессиональнай компетенциялара үрдүк таһымнаах. Олохтоохтору үлэҕэ ылыыны өрө тутар хайысха оҥостобут, ол да буоллар бу күн туругунан биһиэхэ кэлэн үлэлиэн баҕалаах аҕыйах. Ис дьыала уорганнарыгар эр киһи үлэһиккэ наадыйыы улахан, ону баара үксүн кэрэ аҥардар кэлэн үлэни ыйыталаһаллар. Баҕар, манна полиция хамнаһа үрдүгэ эмиэ оруоллаах буолуо. Харчы-харчынан, ол эрээри үлэбит ыарахан.
– Хайдах тэрээһиннээхтик ылаары гынаҕыт сэтинньи 10 күнүн?
– Бу кэлэр бырааһынньыкка улуустааҕы быраабы көмүскүүр система үлэһиттэрин кытары көрсүһүөхпүт. Ааспыты ахтан, кэлэри кэрэһэлээн ааһыахпыт.
Түгэнинэн туһанан, бары бииргэ үлэлэһэр коллегаларбын уонна сүрүннээн үтүөлээх сынньалаҥҥа олорор, кэм да бииргэ үлэлэһэр бэтэрээннэрбитин эҕэрдэлиибин, уһун дьоллоох олоҕу, кытаанах доруобуйаны баҕарабын.
– Алексей Васильевич, кэпсээниҥ иһин махтал. Өссө төгүл полиция күнүнэн эҕэрдэлиибин. Ыарахан үлэҕит, мантан инньэ, олохтоох каадырдар киирэннэр арыый чэпчии түһэригэр бигэтик эрэнэбин.
Кэпсэттэ Евгений СЛЕПЦОВ.