Муома оскуолатыгар национальнай эйгэ саалата арылынна
Муома алын сүһүөх оскуолатыгар национальнай эйгэ саалата арылынна. Оскуола сакааһынан худуоһунньук Анна Саввина саала эркиннэрин эбээн норуотун култууратын көрдөрөр, оройуон кэрэ айылҕатын дьүһүйэр кэрэ ойууларынан киэргэппит.
Оскуола дириэктэрэ Марианна Петровна Михалева киирии тылыгар сааланы ойуулаан-оһуордаан оҥорбуттарга, чуолаан Анна Дмитриевна Саввинаҕа махтанарын эттэ. Салгыы оскуола завуһа Ирина Николаевна Федорова саҥа саала арыллыбытынан эҕэрдэлээтэ уонна эбээн оҕолоро бэйэлэрин национальнай культураларын, төрөөбүт тылларын үөрэтиэхтэригэр эрэнэрин эттэ. Национальнай нэһилиэк баһылыга Александр Васильевич Андреев: “Эбээн оҕолоро бу дьикти кэрэ залга үөрэнэн национальнай патриотизм тыыныгар иитиллиэхтэрэ. Манна история кэрэһитэ буолбут былыргы Зашиверскай куораттан саҕалаан аатырар Кыайыы өргөһүгэр тиийэ оҥоһуллубут. Бу үҥкүүлээн тэйэ сылдьар оҕолору көрөн, киһи эбээн норуотунан киэн туттар, үйэ сайдыытын будулҕаныгар сүппэккэ-оспокко баччааҥҥа диэри кэлбитигэр сөҕөр-махтайар. Кинилэр ыччаттара бэйэлэрин культураларын-тылларын үөрэтиэхтэрэ, сайыннарыахтара», – диэтэ. Национальнай таҥастаах оҕолор киирэннэр эбээннии ыллаатылар- туойдулар, үҥкүүлээтилэр.
Оскуола дириэктэрэ Марианна Петровна, кини ыҥырыытын ылынан, куораттан кэлбит ойууһут Анна Дмитриевна Саввинаҕа кэлэктиип аатыттан “Махтал суругу” туттарда. Анна Дмитриевна харда тылыгар Муома дьоно аламаҕайдарын, ыалдьытымсахтарын бэлиэтээтэ. Кэрэ “Ю” хайаҕа тахсыбытыттан, Индигир эбэҕэ сылдьан балыксыттары көрөн астыммытыттан үөрбүтүн эттэ. Ыҥырбыт Марианна Петровнаҕа махтанан, оскуолаҕа бэйэтэ оҥорбут саҥа хартыынатын бэлэх туттарда. Көрсүһүү һээдьэнэн түмүктэннэ.
Кэлбит дьон саҥа, сонун эйгэҕэ киирэн арыллыбыт сааланы көрдүлэр. Мин, төһө да Муомаҕа уһуннук олордорбун, хаһан да харахтаан көрбөтөх Кыайыым өргөһүн, умуллубут вулкан “Балаҕан тааһы”, Улахан тарыҥы, үрүҥ дьүһүннээх Мрамор хайаны кэрэхсии, сонургуу көрдүм. Саала биир эркинигэр биир таба улахан гына оҥоһуллубута сонуннук көстөр.
Ойууламмыт таба, үҥкүүһүттэр, сибэккилэр лоппоҕор (барельеф) ньыматынан оҥоһуллубуттара олус уратытык көстөр эбит. Урут кураанах истиэнэ эбит буоллаҕына, билигин хамсаан кэлиэх курдук ойуулар көстөллөр. Бэрт үчүгэй саала-кылаас буолбут.
Ааптар: Григорий ФЕДОТОВ.