Соҕуруу дойду көтөрө фламинго Ньурба Нөөрөөйүтүгэр кэлэн түстэ
Олохтоох сылгыһыттар Таркаайы нэһилиэгин Нөөрөөйү сиригэр Былах эбэҕэ муус ыла сырыттахтарына, соҕуруу дойду көтөрө фламинго күөлгэ көтөн кэлэн түспүт.
Владимир Михайлович Илистянов тоҥон титирии сылдьар көтөрү дьиэҕэ киллэрэн ириэрбитин кэннэ, киһиттэн куттаммат, бэйэтин кыанар, аҥар атаҕар турар, ыттарга боотургуур көтөр буолан биэрбит. Сылгыһыттар соҕуруу дойду көтөрө көс көтөрдөрү кытары кэлэн сайылаан баран дойдутугар кыайан көппөтөх диэн сабаҕалыыллар.
Олохтоохтор сарсыардааҥы саһарҕа көтөрүн урут 70-с сылларга биллэн ааспыта диэн этэллэр эбит. Айылҕа харыстабылын Кыһыл Кинигэтигэр киирбит көтөрү Владимир Михайлович Мархаҕа бэтэринээргэ Игнатий Владимирович Андреевка туттарбыт. Улуустааҕы айылҕа харыстабылын кэмитиэтигэр биллэрэннэр Ньурбаҕа киллэриэхтээхтэрин туһунан эттилэр.
Ааптар: Антонина СЕМЕНОВА.