mediaНамҥа Украинаттан көһөн кэлбит дьиэ кэргэн РФ пааспардарын тутта
Нам улууһун дьаһалтатын дьиэтин аактабай саалатыгар Украина гражданиннарыгар РФ пааспарын туттарыы тэрээһинэ үөрүүлээх быһыыга-майгыга буолан ааста. Бу күн I Хомустаах нэһилиэгэр 2004 сыллахха көһөн кэлбит 3 Украина олохтооҕо Российскай Федерация гражданиннарынан ааттаннылар.
Улуус баһылыга Ю.И. Слепцов Нам улууһун дьаһалтатын, дьокутааттарын сэбиэтин, уопсастыбаннаһын ааттарыттан эҕэрдэлээтэ уонна Валентина Анатольевна Трунинаҕа РФ пааспарын туттарда. Ол кэнниттэн Валентина Анатольевна РФ гражданинын кэс тылын долгуйан туран ис сүрэҕиттэн эттэ.
Салгыы I Хомустаах нэһилиэгин баһылыга В.Г. Жирков, Намнааҕы миграционнай пуун начальнига Ж.Н. Тоскина улуус дьаһалтатыгар, ис дьыала уорганнарыгар барҕа махталларын тиэртилэр.
А.Г. Захаров, I Хомустаах нэһилиэгин баһылыгын солбуйааччыта: «Тас дойду гражданнарын пропискалааһын — олус уустук дьыала. Улууспутугар юристар ассоциациялара тэриллэн, атын дойдуттан көһөн кэлэн, 10-тан тахса сыл улахан кыһалҕаны көрсүбүт дьоҥҥо туһааннаах көмөнү оҥорон, бу уустук боппуруос сөптөөхтүк быһаарылынна.
Ассоциацияны тэрийбит Н.Н. Степанов, Т.Н. Степанова, нэһилиэк баһылыга В.Г. Жирков, оҕолор ийэлэрин дьүөгэтэ М.П. Сысолятина, олохтоох оскуола дириэктэрэ У.П. Атласова, үтүө санаалаах кылаас салайааччылара А.А. Томская, М.В. Соловьева быстах кэмнээх прописканы оҥорууга, күннээҕи кыһалҕаларга көмөлөстүлэр.
Бу сыллар тухары нэһилиэк, улуус салалталара, уопсастыбаннаһа — бары биир киһи курдук, Труниннар дьиэ кэргэннэрин олохсутууга туруулаһан туран үлэлээтилэр. Билигин кинилэр үлэлиир, үөрэнэр, судаарыстыба чэпчэтиилэринэн туһанар толору кыахтаннылар».
Валентина Анатольевна: «Россияҕа Херсонскай уобалас Черноморские Колодцы сэлиэнньэтиттэн 2004 сыл олунньутугар 5 буолан кэлбиппит. Оччолорго Россия Украинаны кытта сыһыана үчүгэй буолан, кыраныыссаны эрэйэ суох туораабыппыт. Ийэбит дойдубутугар тыа хаһаайыстыбатын салаатыгар үлэлээбитэ.
Билигин аймахтарбытыгар уонна сорохтор куортамнаан олоробут. Оҕолор үөрэнэллэр. Судаарыстыба чэпчэтиилэринэн туһана иликпит. Россия гражданинын пааспарын ыламмыт, дьэ, салгыы үөрэниэхпит, үлэлиэхпит диэн олус үөрэбит».
Ааптар: А. КОРЯКИНА
